Ижтимоий тармоқларда Фарғона вилояти Олтиариқ туманида 5 ёшли қизчани ўлдириб, ички аъзолари олиб кетилгани ҳақида аудиохабар ва фотосурат тарқалди. Фарғона ИИБ матбуот хизмати ушбу ҳолат вилоят ҳудудида содир этилмаганини маълум қилди.
«Фуқароларимиздан бундай асосланмаган маълумотлар таъсирида қўрқув ва саросимага тушмасликларини сўраймиз. Шу ўринда айрим ҳамюртларимиз учун шахснинг қадр-қиммати камситилишига ёки унинг обрўсизлантирилишига, жамоат тартибига ёки жамоат хавфсизлигига таҳдид солувчи ёлғон ахборотларни тарқатганлик учун қонунларимизда жавобгарлик белгиланганлигини эслатиб ўтамиз.
Юқоридаги овозли хабар ҳам одамлар орасида ваҳима ва саросима уйғотишга, ҳуқуқ-тартибот органларини обрўсизлантиришга қаратилган ёлғон ахборот эканлигини унутманг», — дейилади бошқарма хабарида.
Шунингдек, асоссиз ёлғон ахборот тарқатган фуқаронинг шахсига аниқлик киритиш мақсадида текширув ҳаракатлари ўтказилаётгани қўшимча қилинган.
Маълумот учун, тарқалган суратда акс этган 5 ёшли қиз билан боғлиқ ҳолат 2018 йилда юз берганди. Фарғона вилояти Олтиариқ туманидаги 6-сонли мактабгача таълим ташкилоти тарбияланувчиси бўлган ушбу қизча 6 февралга ўтар кечаси ўлик ҳолда топилган. Дастлаб жиноятда Қўштепа туманида истиқомат қилувчи фуқаро О.А. гумонланиб, 9 февраль куни қўлга олинган. Бироқ ушбу шахснинг жиноий ишга алоқадорлиги ўз тасдиғини топмаган ва у 11 февраль куни қўйиб юборилган.
Мазкур жиноятда дахлдор ҳақиқий жиноятчи — Фарғона вилоятининг Қўштепа тумани Қумтепа қишлоғида яшовчи фуқаро А.А. 14 февраль куни қўлга олинган ва Жиноят кодексининг 137-моддаси (одам ўғирлаш) ва 117-моддаси (хавф остида қолдириш) жиноятларини содир этганликда айбдор деб топилиб, узил-кесил 11 йил озодликдан маҳрум қилинганди.
Изоҳ (0)