АҚШ Молия вазирлиги 17 сентябрь куни Эрон, Ливан ва Кувайтнинг бир қатор фуқароларига қарши санкциялар киритилганини эълон қилди. Санкциялар ушбу шахсларнинг Ливан «Ҳизбуллоҳ» ҳаракати ва Эрон Ислом инқилоби гвардияси корпуси (IRGC)га алоқадорлиги учун жорий этилган.
Ливаннинг икки фуқароси, Кувайтнинг тўрт фуқароси ва Эроннинг олти фуқаросига нисбатан АҚШ санкциялар жорий этилди. Вазирлик баёнотида айтилишича, мазкур шахслар IRGC ва «Ҳизбуллоҳ»ни маблағ билан таъминлайдиган сохта компаниялар тармоғининг аъзолари.
«Бу тармоқлар биргаликда минтақавий молиявий тизимлар орқали ўн миллионлаб долларларни ювиб, ‘Ҳизбуллоҳ’ ва IRGC манфаатлари йўлида валюта операциялари, олтин ва электроника савдосини амалга оширган», — дейилади хабарда.
Баёнотда таъкидланишича, «Ҳизбуллоҳ» IRGC кўмагида ушбу тармоқлар орқали олинган даромадларни «террорчилик фаолиятини молиялаштириш, шунингдек Ливанда ва бутун минтақада беқарорликни сақлаш учун» ишлатмоқда.
Аввалроқ АҚШ Беларусга қарши янги санкциялар жорий қилганди. АҚШ Беларуснинг 23 нафар жисмоний ҳамда 21 та юридик шахси, яъни мудофаа ва энергетика соҳаси компаниялари, ишлаб чиқариш сектори корхоналари ҳамда мамлакат Миллий олимпия қўмитасига нисбатан чекловлар ўрнатди.
Изоҳ (0)