Ягона умумреспублика процессинг маркази (Uzcard) интернет ва ижтимоий тармоқларда компания брендидан фойдаланиб фирибгарлик ҳолатлари ортгани ҳақида огоҳлантирди. Қайд этилишича, фирибгарлар мавжуд бўлмаган лойиҳалар доирасида пул мукофотларини тўлашни ваъда қилиб, одамларни алдамоқда.
«Ёдингизда бўлсин, агар сиз ўзингиз қилмаган ҳаракатлар тўғрисида SMS хабар олган бўлсангиз, банк картаси тафсилотларини, SMS орқали қабул қилинган бир марталик паролларни ёки банк ёки тўлов тизими номидан бошқа шубҳали мурожаатлар ҳақида маълумот сўрови келса, билингки, сиз билан ёмон ниятли кимсалар боғланган.
Аслида эса сиздан олинган маълумотлар уларга ҳисобингизни масофадан бошқаришга, шунингдек, маблағларни бошқа ҳисобларга қийинчиликсиз ўтказишни амалга ошириш имконини беради», — дейилади компания хабарида.
Uzcard, шунингдек, тасдиқланмаган сайтларга пароллар ва шахсий маълумотларни киритишда ҳушёр бўлишга, шахсий маълумотларга учинчи шахсларнинг киришига йўл қўймасликка чақирди.
«Шуни унутманг, ҳар қандай муаммони ҳал қилишдан кўра, унинг олдини олиш осонроқдир. Ноқулай вазиятларга тушиб қолмаслик ва карта ҳисобларидаги пулларингиз хавфсизлигини таъминлаш учун сиздан имкон қадар ҳушёр бўлишингизни сўраймиз.
Агар сизга нисбатан жиноят содир этилган бўлса, зудлик билан хизмат кўрсатувчи банк билан боғланинг, шунингдек, ҳуқуқни муҳофаза қилиш органларига хабар беринг», — дейилади компания хабарида.
Бундан бир неча йил аввал фирибгарлар пластик карталар ҳақидаги маълумотларни йиғиш мақсадида Uzcard сайтининг клонини яратганди.
Изоҳ (0)