Москва метро бекатларидан бирида тожик ва ўзбек тилларида ёзувлар пайдо бўлди, деб хабар бермоқда «РБК». Тожик тилидаги ёзувлар кирилл, ўзбек тилидагилар эса лотин алифбосида кўрсатилган.
Хабарда айтилишича, ҳозирча бу тажриба тариқасида фақат Чертаново Южное туманидаги «Лесопарковая» бекатида жорий қилинган. «РИА Новости»нинг ёзишича, бу бежиз эмас, чунки мазкур бекатдан миграция марказига автобуслар қатнайди.
Метрополитеннинг ўзи уларнинг вазифаси метрони турли йўловчилар учун қулай ва тушунарли қилишдан иборат эканлигини қайд этган. Хусусан, вагонлардаги электрон таблолардаги гаплар 9 тилда кўрсатилади.
Москва шаҳар иқтисодий сиёсат, мулк ва ер муносабатлари бўйича вице-мери Владимир Ефимовнинг апрель ойида берган маълумотларга кўра, Москвада 800 минг нафардан ортиқ чет элликлар ишлайди. Бир йил олдин улар сони 1 миллион кишидан кўп бўлган. Мигрантларнинг аксариятини Қирғизистон (30 фоиз), Ўзбекистон (27 фоиз) ва Тожикистон (20 фоиз) фуқаролари ташкил этади.
Изоҳ (0)