Тошкентнинг Чилонзор туманида @inkuzart тахаллуси билан ижод қилаётган кўча рассоми Абдураҳмон 4 сентябрь куни UzAuto Motors компаниясининг монополиясига атаб стрит-арт чизган эди. 5 сентябрь куни у ушбу ижод намунаси ўчирилаётганини эълон қилди. Воқеа жойида бўлган «Дарё» мухбири ўчириш ҳаракати муваффақиятсиз тугаганига гувоҳ бўлди.
Фото: «Дарё» / Дилруҳ Исомиддинова
«Дарё» мухбирининг қайд этишича, кимдир деворий суратнинг устидан оқ бўёқ тортиб, ўчир(тир)иб ташламоқчи бўлган. Аммо бунинг уддасидан чиқмаган. Суратдан ҳам кўриш мумкинки, ўчириш учун бунинг ўзи етарли бўлмаган. Стрит-артда ва ерда оҳак излари қолган.
Автомонополияга қарши сурат ҳамон АҚШнинг Чилонзордаги эски элчихонаси деворларида турибди ва унинг фонида ҳали ҳам суратга тушиш мумкин.
Унда Ўзбекистондаги автосалонларда машина харид қилиш учун юзага келаётган узундан узоқ навбат тасвирланган. Навбат бошида турган инсоннинг қизил бош кийими «шапка» тизимига ишора қилади.
Изоҳ (0)