Афғонистонда ҳокимият тепасига келган «Толибон» ҳаракати Хитойни ўзининг асосий халқаро ҳамкори деб билади. Бу ҳақда ҳаракат вакили Забиҳулла Мужоҳид маълум қилди.
«Хитой — бизнинг бош ҳамкоримиз, мамлакатимизга сармоя киритишга ва уни қайта қуришга тайёрлиги билан Хитой биз учун муҳим ва алоҳида имкониятдир», — деди Мужоҳид Италиянинг La Repubblica газетасига берган интервьюсида.
Мужоҳид Пекиннинг «Бир камар — бир йўл» дастурини юқори эътироф этиб, у «қадимий Ипак йўлини қайта тиклашга хизмат қилишини» таъкидлади.
У, шунингдек, Хитой Афғонистонда тоғ-кон саноати тикланишига ёрдам беришига умид билдирди. «Қолаверса, бизда мисга бой конлар бор, хитойликларнинг ёрдами билан уларни ишлаб чиқаришга қайтариш ва модернизация қилиш мумкин», — дейди «Толибон» вакили.
«Хитой — бизни бутун дунё бозорларига олиб чиқадиган дарвозамиз», — дея таъкидлади Мужоҳид.
Аввалроқ Хитой ташқи ишлар вазирининг ёрдамчиси У Сзянхао «Толибон»нинг Қатардаги сиёсий идораси директори ўринбосари Абдулла Салам Ҳанафий билан телефон орқали мулоқот қилгани ҳақида хабар берилган.
У Сзянхаонинг сўзларига кўра, Афғонистондаги вазият туб ўзгаришларга учраган ва «Афғонистон келажаги яна афғон халқи қўлида».
Хитойлик дипломатнинг таъкидлашича, Пекин ҳар доим Афғонистон суверенитети, мустақиллиги ва ҳудудий яхлитлигини ҳурмат қилган ва бутун афғон халқига нисбатан дўстона сиёсат олиб борган. У Афғонистон «тез орада тинчлик ва барқарорликка эришишига ва мамлакат гўзаллиги қайта тикланишига» умид билдирди.
Ташқи ишлар вазирлигида қайд этилишича, Ҳанафий «Хитой Афғонистоннинг ишончли дўсти» деган.
«Толибон» Афғонистон ва Хитой ўртасидаги дўстона муносабатларни ривожлантиришга содиқликни сақлашга тайёр ва ҳеч қачон Афғонистон ҳудудидан бирорта кучнинг Хитой манфаатларига таҳдид солишига йўл қўймайди, шунингдек, Афғонистондаги Хитой муассасалари ва ходимларининг хавфсизлигини таъминлаш учун ҳам самарали чоралар кўради», — деди у.
Ҳанафийнинг сўзларига кўра, афғон расмийлари Хитойнинг Афғонистон ва минтақанинг ривожланиши ҳамда гуллаб-яшнашига ҳисса қўшадиган «Бир камар — бир йўл» дастурини қўллаб-қувватлаш ва дастур доирасида ҳамкорлик қилишга тайёр.
Изоҳ (0)