Бельгиянинг Eccholine BV халқаро продюсерлик компанияси томонидан Франциянинг М-6 телекомпанияси учун суратга олинаётган «Пекин экспресси» (Peking Express) саргузашт реалити-шоуси иштирокчилари Наманганга келди. Бу ҳақда «Дарё» мухбири Азизбек Абдувалиев хабар бермоқда.
Ушбу реалити-шоу қатнашчилари бир неча гуруҳларга бўлинади. Ҳар бир гуруҳда икки киши бўлиб, улар Ўзбекистон бўйлаб саёҳатга жўнайди. Тасвирга олиш ишлари 2021 йил 3 сентябрь куни Наманган шаҳрида бошланиб, 15 сентябрда Қорақалпоғистонда якунланади.
«Реалити-шоу сюжети шундан иборатки, ҳар бир гуруҳ кунига атиги 1 евро маблағ билан саёҳатга отланади. Бюджетнинг ўта чеклангани қатнашчиларни маҳаллий аҳолининг кўмаги ва меҳмондўстлигига таянишга ундайди. Бу эса, ўз навбатида, кўзда тутилмаган воқеа-ҳодисалар сабаб бўлади, томошабинларга эса маҳаллий урф-одат ва анъаналар билан яқиндан танишиш имкониятини яратади», — дейди Наманган вилоят туризм ва спорт бош бошқармаси бошлиғининг ўринбосари Аюбхон Бобомирзаев.
Бобомирзаевнинг айтишича, Наманганга «Пекин экспресси» реалити-шоуси тасвирга олиш гуруҳи ва иштирокчиларидан иборат жами 87 киши келган. Улар орасида Франция, Бельгия, Нидерландия, Канада, Коста-Рика, Дания, Марокаш каби 15 дан ортиқ давлат вакиллари бор.
Маълумот учун, мазкур телешоу Евроиттифоқ ва Жанубий Америка телеканаллари орқали намойиш этилади. Унинг ҳар бир эпизодини ўртача 3 миллиондан ортиқ томошабин кузатиб боради.
Изоҳ (0)