Baseus компанияси смартфон ва ноутбуклар учун мўлжалланган «иккитаси бирда» қувватлантиргични тақдим этди

Baseus ассортименти кўплаб гаджет фойдаланувчиларига қўл келиши мумкин бўлган қурилма билан тўлдирилди. Компания муҳандислари битта корпусга қуввати 87 ваттга тенг галлий нитридли қувватлантириш блоки ва сиғими 10 минг мА/соатга тенг мобил аккумуляторни жойлаштирган, деб хабар беради IXBT.

Гаджетларни қувватлантириш учун иккита порт мавжуд: USB Type-А ва USB Type-C. Уларнинг биринчиси 22,5 ваттни, иккинчиси эса 65 ваттни тақдим этади. Шунга мос равишда USB-C’дан нафақат смартфон ва планшетларни, балки ноутбукларни ҳам қувватлантириш мумкин. Масалан, MacBook Pro 30 дақиқа ичида 39 фоиз қувват олади.

Мобил аккумуляторлар билан ишлаш вақтида USB-C портининг қуввати сезиларли даражада пасаяди: ундан максимум 20 ватт олиш мумкин. Чиқувчи USB Type-А порти қуввати ўзгармайди ва 22,5 ваттни ташкил этганча қолади.

Қурилма қувват аккумулятори индикатори ва қайрилувчи «вилка» билан жиҳозланган, шунингдек, унинг жамланмасидан 100 ваттли қувват узатишни таъминловчи USB-C қувватлантириш кабели ўрин олган. Ҳозирда янги қурилма коллектив молиялаштириш платформасига жойлаштирилган бўлиб, унинг нархи 28 долларни ташкил этмоқда. Чакана савдода нархи 31 долларга етади.

Аввалроқ Lenovo ноутбуклар учун мўлжалланган симсиз қувватлантиргичини тақдим этгани тўғрисида хабар берилганди.