Косметик воситалар ёрдамида ҳар куни пардоз қилишни истамайдиганларга қўл келадиган тавсияларни ҳавола қиламиз.
Улама киприкнинг алоҳида-алоҳида ёпиштириладиганидан фойдаланинг
Бундай улама киприк табиийдек кўринади. Унинг афзаллиги ортиқча пул сарфланмаслиги ва тез самара беришида. Ёпиштирилганидан кейин кичкина кўзлар катта, нигоҳлар эса ёрқин кўринади. Узоқ вақт турмаслиги эса унга хос камчиликлардан бири саналади.
Узоқ вақт турадиган киприк улатиш
Бу муолажани амалга ошириш учун мутахассис юқори малакага эга бўлиши керак. Чунки киприк толалари бир текисда бўлиши керак. Афзаллиги — киприги қалин ва узун бўлмаганлар учун айни муддао ҳисобланади, қолаверса, макияж қилиш учун ҳам ортиқча вақт сарфланмайди. Узунлиги, қайрилиши ва қалинлигини доимий равишда моделлаштирса бўлади. Узунлик ва шакл тўғри танланса, ҳеч ким киприклар сунъийлигини пайқамайди.
Камчиликлари ва эҳтимолий оқибатлари эса қуйидагилардан иборат:
- аллергия;
- кўзларнинг қизариши;
- қичишиш.
Уламадан кейин киприкларни қандай тиклаш мумкин?
Уларнинг тикланиш вақти шикастланиш даражасига боғлиқ бўлади ва 4 ҳафтадан 2—3 ойгача вақт кетиши мумкин. Канакунжут ёғи киприкларни тиклаш хусусиятига эга бўлган энг яхши восита саналади. Киприкларни озиқлантиради ва намлантирадиган мазкур ёғни бир ой давомида ҳар куни суртиш тавсия қилинади. Канакунжут ёғидан ташқари, бодом, шафтоли ва зайтун ёғидан фойдалансангиз ҳам бўлади. Агар улар аралаштирилса, янада яхши самара беради. Бундай восита нафақат киприкларни намлантиради, балки озиқлантиради ҳам.
Киприкларни ламинациялаш
Ушбу муолажада киприклар шикастланмайди, таркибнинг табиий экани ҳисобига толалар мустаҳкамланади. Киприклар табиий кўринади ва қўшимча парвариш талаб қилмайди. Йўлга отланганлар, ҳовузда чўмиладиганлар учун ушбу муолажа айни муддао.
Ушбу муолажа қуйидагиларга тавсия қилинмайди:
- ҳомиладорлар ва энди фарзандли бўлганларга;
- таркибидаги компонентларга аллергияси бўлганларга;
- кўз касаллигидан азият чекадиган беморларга.
Изоҳ (0)