Токио шаҳрида Паралимпия ўйинлари давом этмоқда. 28 август куни бир қатор ўзбекистонлик спортчилар ўз иштирокини ўтказди.
Аёллар ўртасида пара-енгил атлетиканинг найза улоқтириш турида F13 классида Нозимахон Қаюмова олтин медални қўлга киритди. Тажрибали спортчи 42.59 метр натижа билан биринчи ўринни эгаллади.
Пара-енгил атлетиканинг F12 тоифасида ядро улоқтириш баҳсларида иштирок этган Элбек Султонов 15.94 метр натижа қайд этиб, бронза медалига сазовор бўлди. Таъкидлаш жоиз, бу Султонов учун янги шахсий натижа бўлди. Ғолиблик жаҳон рекордини ўрнатган испаниялик Ким Лопесга (17.04) насиб этган бўлса, украиналик Роман Данилюк (16.53) кумуш медалга эга чиқди.
F57 тоифасида диск улоқтириш баҳсида қатнашган Моҳигул Ҳамдамова 31.46 метр натижа қайд этди ва олтин медални қўлга киритди. Паралимпия ўйинлари чемпионига айланган Моҳигул Ўзбекистон делегацияси учун учинчи олтин медални тақдим этди.
Пара-пауэрлифтинг бўйича аёллар ўртасида -61 кг вазн тоифасида ҳаракат қилган Рўза Қўзиева 130 кг тошни бўйсундирган ҳолда кумуш медалга сазовор бўлди.
Ўзбекистон делегацияси қўлга киритган медаллар сони 7 тага етди. Аввалроқ Ислом Асланов сузиш бўйича бронза медалига эга чиққан бўлса, Учқун Қуронбоев парадзюдо бўйича олтин медал, пара енгил атлетика бўйcиҳа Асила Мирзаёрова кумуш медал соҳибига айланганди.
Изоҳ (0)