Туғруқдан кейинги депрессия: 8 та яширин симптом

Жаҳон соғлиқни сақлаш ташкилоти маълумотларига кўра, туғруқдан кейин аёлларнинг камида 13 фоизи депрессияни бошдан кечиради. Шу билан бирга, беморларнинг деярли тўртдан уч қисми ҳатто касал эканликларига шубҳа ҳам қилмайди. Бу жуда хавфлидир, чунки туғруқдан кейинги депрессия ҳаёт учун хатарли ҳолат бўлиб, баъзида ўз жонига қасд қилишга олиб келиши мумкин. Ўз вақтида чоралар кўриш ва шифокор билан маслаҳатлашиш учун нафақат аёлнинг ўзи, балки унинг яқинлари учун ҳам депрессия ривожланишининг аломатларини билиш жуда муҳим: бу ҳолат ўз-ўзидан ўтиб кетмайди.

Ҳаддан ортиқ ташвишланиш

Ҳамма оналар боланинг саломатлиги ва фаровонлиги ҳақида қайғуради, шунингдек, унинг аҳволидан хавотирда бўлади. Агар ташвиш ҳисси кучайиб борса, аёлга кеча-ю кундуз ҳамроҳлик қилса, иложи борича тезроқ шифокор билан маслаҳатлашиш керак. Бу депрессия ривожланишининг белгиларидан бири бўлиши мумкин.

Қаттиқ асабийлашиш

Албатта, уйқусизлик, янги вазифа, юқори масъулият, шунингдек, бошқаларнинг етарлича қўллаб-қувватламаслиги ғазаб ва асабийликнинг пайдо бўлишига олиб келиши мумкин. Аммо энг кичик муаммоларга ҳам тўсатдан кучли ғазабланиш табиий жавоб бўладиган бўлса, бу руҳий тушкунлик ривожланишининг белгисидир.

Қарор қабул қилишда қийинчилик

Яна бир огоҳлантириш белгиси – диққатни жамлашда қийинчилик ва қарор қабул қила олмаслик. Ҳатто энг оддий ва таниш вазиятда ҳам танлов қила олмаслик депрессия белгиларидан бири, шу жумладан, бу бола туғилгандан кейин ривожланади.

Иштаҳанинг ўзгариши

Эмизикли она сути йўқолмаслиги ва лактация муаммосиз давом этиши учун одатдаги меъёрига қўшимча равишда кунига камида 500 калория керак. Аммо аёл одатдагидан кўра кўпроқ овқат истеъмол қилса ёки аксинча, деярли ҳеч нарса емаса, бу жуда жиддий аломатдир. Ва иложи бўлса, тезроқ шифокорга кўриниш керак.

Уйқуда муаммолар

Ростини айтганда бола туғилгандан кейин уйқу режими ҳам, унинг ҳам сифати муқаррар равишда ўзгаради. Аммо аёл қанчалик чарчаган бўлса ҳам  аёл ухлай олмаса, бу жуда жиддий белгидир. Бундай вақтда, албатта, шифокор билан маслаҳатлашиш керак: даволаниш учун асаб тизимини қўллаб-қувватлайдиган ва дам олиш қобилиятини тиклайдиган махсус дорилар буюрилиши мумкин.

Болага бефарқлик

Бола туғган аёллар ҳар доим ҳам унга бўлган муҳаббат ва меҳрни дарҳол ҳис қилавермайди – бу нормал ҳолат. Аммо агар аёл чақалоққа нисбатан фақат ғазабланиш ёки бефарқликни ҳис қилса, уни доимий ноқулайлик манбайи сифатида қабул қилса, нима бўлаётганига аҳамият бермаса, шошилинч равишда онага ёрдам керак.

Яхши она бўла олмаслик гумони

«Мен ёмон онаман!» – ҳар бир она ҳаётида ҳеч бўлмаганда бир марта ўзига айтади. Аммо туғруқдан кейинги депрессияга дуч келган аёллар том маънода шу туйғуга ғарқ бўлади: улар ҳеч қачон боласига ғамхўрлик қила олмасликларига, чақалоқ у билан эмас, балки бошқа билан яхшироқ бўлишига ишонади. Яна бир аломат – бу сезги узоқ вақт давомида йўқолмайди.

Доимий йиғлаш истаги

Ҳомиладорлик ва туғруқ каби жиддий ҳиссий тажриба, шунингдек, бу вақтда юзага келадиган гормонал шоклар, ниҳоят, уйқусизлик – буларнинг ҳаммаси аёлларни ҳаяжонланишга ва йиғлашга мойил қилади. Аммо туғруқдан икки ҳафта ўтгач ҳам йиғлаш истаги йўқолмаса, бу ҳақда доктор билан гаплашиш керак.