Тошкентда ярим тунда Spark эшигини бузиб, пул ўғирлаган икки ўсмир қўлга олинди

Тошкентнинг Олмазор туманида Spark эшигини бузиб очиб, пул ўғирлаган икки ўсмир қўлга олинди. Бу ҳақда пойтахт ИИББ матбуот хизмати хабар берди.

Хабарга кўра, 25 август куни икки нафар ўсмир туманнинг Хушҳаво кўчасида қолдирилган Spark эшигини очиб, ичидан автомобиль эгасига тегишли 120 минг сўм пулни ўғирлаб кетган. Бу ҳолат уйнинг рўпарасида ўрнатилган камерага тушиб қолган.

Мазкур факт асосида Жиноят кодексининг 169-моддаси (ўғрилик) бўйича жиноят иши қўзғатилган. Кўрилган чоралар давомида ўғриликда гумонланувчи — 14 ёшли М.Г. ва 15 ёшли Н.Й. қўлга олинган.

Айни пайтда тергов давом этмоқда.

Аввалроқ Тошкентда автомобиль шиналари ва дискларини ўғирлаб, ўрнига ғишт қўйиб кетаётган шахслар ушлангани ҳақида хабар берилган эди.