Ўзбекистон Олий судида 2021 йил 25 август куни ўтказилган очиқ суд мажлисларида мустабид Совет тузуми даврида қатағон қурбони бўлган ва ҳозирги кунга қадар оқланмаган 115 нафар шахс жами 6 та жиноят иши бўйича оқланди. Суд жараёнларидан кейин Олий суд раиси ўринбосари Икром Муслимов журналистларни қизиқтирган саволларга жавоб қайтарди. Бу ҳақда «Дарё» мухбири Миролим Исажонов хабар бермоқда.
— Бугунги суд мажлисида қатағон қурбонларининг фақат 115 нафарининг номи оқланди. Қолганлари-чи?
— Президент фармойиши эълон қилинганидан кейин биз игна билан қудуқ қазигандек қурбонларнинг 28 нафарини топдик. Шундан сўнг ҳужжатларни кўтарсак, бу иш доирасида 115 нафар шахс бор экан. Улар номининг оқлангани фармойиш асосида қилинган ишнинг биринчи меваси, дейиш мумкин.
Агар ҳақиқатан фуқароларимиз орасида бир пайтлари аждодларим қатағон қурбони бўлган, деган фикрда юрувчилар бўлса, ишчи гуруҳга мурожаат қилишсин ва биз албатта, уни ўрганиб, кўриб чиқамиз.
— Қурбонларнинг авлодларини топиш катта вақт талаб қилади ёки ҳаммасининг ҳам қариндошларини топиб бўлмаслиги мумкин. Шунинг учун «босмачи» тамғаси қўйилган барча ватанпарвар шахслар номи битта махсус ҳуқуқий ҳужжат билан оқланиши керакдир, балки?
— Ҳар бир ташкилотнинг, ҳар бир раҳбарнинг ўз ваколати бор. Биз ваколат доирасида иш қилишимиз керак. Мана, ҳозир қурбонларнинг ҳар бирининг исм-фамилиясини эринмасдан уч мартадан ўқиб чиқдим. Бу менинг вазифам.
Ўша даврда фавқулодда судлар ташкил қилинган. Бугунги кунда Ўзбекистонда фавқулодда суд ташкил этилишига йўл қўйилмайди. Бу Конституция билан белгиланган. Агар шунақа ҳолатлар бўладиган бўлса, биз бу бўйича ишлашга тайёрмиз. Битта фармон билан кимни оқлаб бўлади?
Шу ўринда бир мисол келтираман, қурбонлар рўйхатида Қосимов Саъдулла деган инсон бор. У Олий суднинг биринчи раиси бўлган, лекин қатағон қурбони бўлиб кетган. Унга оид жиноят ишини Россияда кўришган ва жиноят иши ҳужжатлари бугунги кунда Россия Олий судида сақланяпти. Ўша инсоннинг жиноят иши бизнинг қўлимизда бўлмаганлиги учун жараёнга ўтолмадик. Ўйлайманки, республика ишчи гуруҳи дипломатик йўллар билан у ишга оид ҳужжатларни ҳам чақириб, кўриб чиқади.
— «Босмачи»ларни сотганлар ёки уларга гувоҳлик берганларнинг исм-фамилияси нега ошкор қилинмаяпти?
— Жиноят иши доирасида ҳаммаси мавжуд. Биз ҳозир биринчи босқичдамиз.
— Номи оқланган 115 нафар қатағон қурбонларининг авлодлари моддий ёки маънавий зарар ундириш бўйича кейинги босқичга чиқиши мумкинми?
— Жиноят-процессуал кодексида реабилитация асослари бор. Агар шу асослар бўйича тегишли судларга мурожаат қилинса, кўриб чиқилади.
Изоҳ (0)