Навоий вилояти Хатирчи туманида маст ҳолатдаги шахс қўшнисининг уйига ўғирликка тушиб, хонадон эгасини аёвсиз калтаклади, дея хабар бермоқда «Замон» информацион дастури.
Хатирчилик 1987 йилда туғилган фуқаро дўстлари билан ҳашардан ва кичик зиёфатдан сўнг маст ҳолда қўшниси 69 ёшли аёл уйига босқинчилик йўли билан киради.
«Момонинг уйига кирдим, ухлаб ётган экан. Устидан сакраб ўтиб, пул қидирдим. Момо уйғониб қолгандан кейин оғзига урдим. Ёстиғини тагидан 50 минг пул чиқди, киссамга солиб, чиқиб кетдим», – дейди айбланувчи.
Оғир аҳволда шифохонага олиб келинган аёл травматология бўлимига ётқизилади. Унга аралаш жароҳат, бош мия чайқалиши, ўнг елка суягининг қўлтиқ ости чиқиши, юзи, танаси, боши кўкарган жароҳатлари ташхиси қўйилган.
Шифокорнинг таъкидлашича, ҳозирда аёлнинг умумий аҳволи ўрта оғир.
Мазкур ҳолат юзасидан Жиноят кодексининг 164-моддаси 3-қисми «в» банди (уй-жойга ғайриқонуний равишда кирган ҳолда босқинчилик қилиш) билан жиноий иш қўзғатилиб, дастлабки тергов ҳаракатлари ўтказилмоқда.
Маълумот учун, ушбу модда билан айбланган шахс 10 йилдан 15 йилгача озодликдан маҳрум қилиниши мумкин.
Бундан аввал Наманганда 23 ёшли йигит шифохонада ишловчи танишининг юзини куйдириб, унинг 7,5 миллион сўмлик тилла тақинчоқлари ва телефонини олиб қочгани, Фарғонада 29 ёшли эркак қўшни келинни пичоқлаб ўлдиргани ҳамда Бухорода босқинчилик йўли билан ногирон фуқаронинг мол-мулкини талон-торож қилган ёшларга суд ҳукми ўқилгани ҳақида хабар берилганди.
Изоҳ (0)