Қашқадарё вилояти ҳокими Зоир Мирзаев Маданият вазирлигининг ҳудудий бошқармаси бошлиғи Салим Сайимовни ишдан олди. Бу ҳақда хабар берган «Дарё» мухбирига кўра, Салим Сайимов ўз ишига масъулиятсизлик билан қараган.
Қайд этилишича, Зоир Мирзаев бу ҳақда бугун, 23 август куни бўлиб ўтган аппарат йиғилишида маълум қилиб, бошқармага янги раҳбар — Исоқ Тўраевни раҳбар этиб тайинлаганини маълум қилган.
Исоқ Тўраев кўпчиликка манзур бўлган «Барон» фильмида роль ижро этиб, томошабинларга танилган.
«Бошқарма бошлиғини бир неча маротаба огоҳлантиргандим, камчиликларини қайта-қайта эслатдим. Аммо хулоса қилмади. Тўқсонинчи йилларда Қарши шаҳри маданият ўчоғи бўлган. Концерт дастурлари ва ижодий кечалар ўтказишда Қаршининг, Қашқадарёнинг ўз тажрибаси бор. Қани ўша масъулият? Нега бор имкониятдан фойдалана олмаймиз», — деган вилоят раҳбари ҳудудий бошқарма бошлиғи Салим Сайимовнинг масъулиятсизлиги ҳақида гапирар экан.
Зоир Мирзаев маданият вазири Озодбек Назарбеков билан ҳам бу борада бир неча маротаба гаплашганини, вазир вилоят маданият бошқармасига берилган имконият, шарт-шароит бошқа вилоятларда йўқлигини эътироф этган.
«Дарё» мухбирининг қўшимча қилишича, вилоят ҳокими мазкур йиғилишда ўринбосарлари — Рустам Йўлдошев ҳамда Долли Аллаевга вилоятда мамлакат мустақиллигининг 30 йиллигига тайёргарлик кўриш ва халққа манзур бўладиган концерт дастурларини ташкил этиш масъулиятини юклаган.
Изоҳ (0)