АОКАда 19 август куни Токио—2020 Олимпиадаси якунларига бағишланган матбуот анжумани бўлиб ўтди. Матбуот анжуманида МОҚ бош котиби Ойбек Қосимов бокс мусобақаларидаги ҳакамлик ҳақида гапирди.
Бокс мусобақалари бошланганидан кейин спортимиз мухлислари боксчиларимизни ғалабаларига ўрганиб қолишгани учун улардан катта натижалар кутишди. Боксчиларимиз биринчи босқичданоқ мағлуб бўлишлари ҳаммамиз учун кутилмаган ҳолат бўлди.Маълумот учун айтаман, бу Олимпиададаги бокс мусобақалари AIBA томонидан ташкил этилмади. Балки ХОҚ томонидан тузилган махсус гуруҳ томонидан ташкил этилди. Ушбу гуруҳда Халқаро гимнастика федерацияси раҳбари Моринаре Ватанабе, Халқаро дзюдо федерацияси раҳбари Мариус Визер, Халқаро кураш федерацияси раҳбари Ненад Лалович уч хил йўналиш бўйича мусобақаларни ташкил этишди.
Бевосита мусобақалар қисмига жаноб Ватанабе масъул бўлганлиги учун биз зудлик билан улардан учрашув сўрадик ва Ўзбекистон МОҚ раҳбари билан учрашув ташкиллаштиришга эришдик. Мен ҳам ана шу учрашувда иштирок этдим ва суҳбат давомида таржимонлик вазифасини ҳам бажардим. Бевосита гувоҳ сифатида, бўлган суҳбат ҳақида айтишим мумкин.
Биз суҳбат давомида уларга қаттиқ эътироз билдириб қўйишдан қўрқдик. Биз масалани кўндаланг қўйиш керакми ёки йўқ дея жуда узоқ ўйладик. Сабаби эртага ўртага қўяётган масаламиз ўзимизга қарши ишлаб қолмасин. Шу нуқтаи назардан фақатгина мутахассислар, мураббийлар штаби билан маслаҳатлашиб, ҳақиқатан ҳам у ерда қанчалик даражада ҳакамлик тактик жиҳатдан бизга қарши бўлди деган масалани ўртага қўйдик.
Улар билан суҳбат давомида биз ҳаммамиз ўйлаётгандек 100% ноҳақ ҳакамлик эмас, балки қаердадир нотўғри ҳисоб китоблар бўлганлигини таъкидлаб ўтишди. Шу масалани биз эътироз сифатида Ватанабе жанобларига айтдик. Асос сифатида эса 33 миллионлик ўзбек халқи Ўзбекистон боксчиларидан юқори натижаларни ва адолатни кутиб қолишини маълум қилдик. Ватанабе жаноблари биз учун алоҳида махсус шахсни белгилаб берди. Биз у шахс билан жангларни қайта томоша қилиб, қўйилган натижаларни таҳлил қилдик.
У ердаги аниқ рақамларни айтишдан йироқман, лекин боксчимиз Миразизбек Мирзахалилов тўлиқ устунлик қилиб турса ҳам, ҳакамлар ирландиялик боксчини ғолиб деб топишди. Ўшанда америкалик ҳакам томонидан тушунарсиз баҳо қўйилганлиги учун, унинг ҳаракати шубҳали деб топилди. Улар бу ҳолатни қуйидагича тушунтириб берди: ҳар бир жангда ҳакамлардан ташқари уларнинг устидан яна иккита назоратчи қўйилган. Яққол устунлик бўлиб турган жойда шубҳали баҳо берган ҳакамнинг ҳаракати алоҳида ўрганилиб, керак бўлса, зудлик билан шу жойнинг ўзида ҳакамликдан четлаштирилиши тўғрисида айтиб ўтилган эди.
Натижада бокс мусобақалари давомида, биз масалани кўтаргандан сўнг бокс мусобақаларидан иккита ҳакам четлатилганлигини бизга айтишди. Афсуски, уларнинг қоидаси бўйича, худди футболдагидек жазо фақатгина ҳакамга бўлиб, натижа эса ўзгаришсиз қолар экан.
Ойбек Қосимов, МОҚ бош котиби
Маълумот учун, -57 кг вазн тоифасида Ўзбекистон шарафини ҳимоя қилган Миразизбек Мирзахалилов 1/8 финалда ирландиялик Кёрт Уокерга қарши жангда устунликка эга бўлганига қарамай, ҳакамлар ғалабани Уокерга берганди.
Изоҳ (0)