Ўзбекистон орқали 2000 га яқин хорижий фуқаролар Афғонистондан эвакуация қилинган. Бу ҳақда Ташқи ишлар вазирлиги матбуот хизмати хабар қилди.
Таъкидланишича, ҳозирги вақтда Германия, Россия, Швейцария, Австрия, Дания, Польша, Словакия, Қозоғистон каби давлатлар билан аэропорт инфратузилмасидан фойдаланиш хизматларини тақдим этиш, ҳаво макони орқали учишга рухсат бериш, аэропортга учиб келиш, қўниш, зарур техник ва логистика ёрдамини кўрсатиш бўйича биргаликда саъй-ҳаракатлар амалга оширилмоқда.
Хорижлик ҳамкорлар билан биргаликда дастлабки тарзда келишилган мамлакатларга жўнатилаётган ҳам чет эл фуқаролари, ҳам Афғонистон фуқароларини Афғонистондан эвакуация қилиш ва Ўзбекистон ҳудуди орқали транзитни амалга ошириш бўйича тартибли ишлар йўлга қўйилган.
Маълум қилинишича, ўтган бир неча кун мобайнида Ўзбекистон ҳудуди орқали хорижий давлатларнинг 1982 фуқароси эвакуация қилинган.Эвакуация қилинаётган фуқароларга Ўзбекистон ҳудудида қисқа муддатли бўлиб туриш пайтида карантин чораларига қатъий риоя этган ҳолда барча зарур ёрдам кўрсатилмоқда, шундан сўнг кечиктирилмасдан режалаштирилган манзил-мамлакатига жўнатилмоқда.
Бундан аввал Афғонистондан Польша фуқароларини эвакуация қилаётган самолётлар Навоийга қўнаётгани, Шавкат Мирзиёев Ангела Меркель билан фуқароларни Афғонистондан Ўзбекистон орқали эвакуация қилиш жараёнини муҳокама қилгани ҳамда Швейцария ҳам Афғонистондаги фуқароларини Ўзбекистон ҳудуди орқали эвакуация қилиши ҳақида хабар берилганди.
Изоҳ (0)