Афғонистондан АҚШ фуқароларини эвакуация қилиш учун зарур бўладиган бўлса, Америка қўшинлари у ерда 31 августдан кейин ҳам қолиши мумкин. Бу ҳақда АҚШ президенти Жо Байден АБC телеканалига берган интервьюсида маълум қилди. Аввалроқ у ушбу санани қўшинларни олиб чиқиб кетиш учун якуний муддат деб белгилаган эди.
«Америкаликлар шуни тушуниши керакки, биз бу жараённи 31 августгача тугатишга ҳаракат қиламиз, — деди Байден. — … агар у ерда ҳалиям Америка фуқаролари бўлса, биз уларнинг барчасини олиб кетиш учун қоламиз».
Президентнинг сўзларига кўра, Афғонистондан эвакуация қилиш керак бўлган америкаликлар сони 10-15 минг нафарни ташкил қилмоқда. АҚШ, шунингдек, ўз иттифоқчиларини — камида 65 минг афғонистонликни ҳам олиб кетишни умид қилмоқда.
Бундан ташқари, Байденнинг айтишича, Америка қўшинларини Афғонистондан олиб кетишда тартибсизлик юзага келмаслигининг иложи йўқ эди. «Қўшинларни олиб кетиш билан боғлиқ вазиятдан тартибсизлик юзага келмаган ҳолда чиқиб кетиш мумкин, деган фикрга қўшилмайман», — деди Байден.
Давлат раҳбарининг сўзларига кўра, унинг маъмуриятидагилар «Толибон» ҳаракатининг кейинги қадамларини олдиндан кўра олмаган.
Апрель ойида Байден Америка қўшинларининг барчасини Нью-Йорк ва Вашингтонда 2001 йил 11 сентябрда юз берган терактларга 20 йил тўладиган кунгача олиб чиқиб кетишни ваъда қилган эди. Кейинроқ муддат 31 августга сурилди. Июлга келиб, Афғонистондан АҚШ ҳарбий контингентининг 90 фоизи чиқиб кетди. Шундан кейин «Толибон» ҳукумат ҳарбий кучларига қарши ҳужумларни кучайтирди. 15 август куни жангарилар Кобулдаги президент саройига кирди ва Афғонистонни тўлиқ эгаллаб олганини эълон қилди. Президент Ашраф Ғани мамлакатдан қочиб кетди.
Изоҳ (0)