Фарғонада омбор мудири аҳоли ва давлат ташкилотларига тарқатилиши керак бўлган 852 минг тонна кўмирни сотиб юборгани аниқланди

Фарғона вилоятининг Олтиариқ туманида 852 минг тонна кўмир маҳсулотларини талон-торож қилган шахсга жиноят иши қўзғатилди. Бу ҳақда ИИВ Транспорт ва туризм объектларида хавфсизликни таъминлаш департаменти хабар берди.

10 август куни Фарғона вилояти ИИБ ТХТБга келиб тушган маълумотга кўра, 6 июль куни Қўқон бирлашган ёнилғи омбор хўжалиги Фарғона вилояти Олтиариқ кўмир омбори кўрикдан ўтказилганда, ушбу омбор мудири лавозимида ишловчи 28 ёшли А.К. ўзининг моддий жавобгарлигида бўлган умумий нархи 541 миллион 20 минг сўмлик 852 минг тонна БР3 маркали кўмир маҳсулотларини ўз манфаатини кўзлаб, қора бозорда сотиб юборгани маълум бўлган ва унга нисбатан қонуний чора кўрилиши ҳамда етказилган моддий зарар ундирилишида амалий ёрдам берилиши сўралган.

Терговга қадар текширув ҳаракатлари давомида А.К. ўзига бириктирилган, аҳоли ва бюджет ташкилотларига тарқатилиши лозим бўлган 852 минг тонна БР3 маркали кўмир маҳсулотларини пулини кейинчалик бериш шарти билан танишларига арзон нархда сотиб юборгани аниқланган.

Ҳолат юзасидан А.К.га нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш) билан жиноят иши қўзғатилган.