Toyota компанияси Lego конструкторидан ясалган тўлиқ ўлчамли GR Supra нусхасини намойиш этди. Ноодатий купени ясашга 2700 соат вақт сарфланган — Gazoo Racing жамоаси ва Lego йиғувчилар 1885 килограммли улкан макет мустақил ҳаракатлана олиши учун меҳнат қилган. Toyota спорткар нусхасидан фаол фойдаланиш ниятида — 11 октябрга қадар модель Legoland Japan стендини безаб туради, шундан сўнг купени Super GT пойга серияси бўйича тур кутмоқда, деб хабар беради Motor.
Toyota GR Supra’нинг тўлиқ ўлчамли макети 477 303 дона Lego донасидан иборат бўлиб, болалар учун мўлжалланган ўйинчоқдан йиғилган купе оғирлиги 3,0 литрли BMW двигатели ўрнатилган ҳақиқий спорткардан чорак тоннага оғирроқ.
Эҳтиёт қисмларнинг бир қисми оригинал Supra’дан олишга тўғри келган — гап ғилдираклар, «шилдиклар», ҳайдовчи ўриндиғи, тепкилар, қурилмалар панели ва рул чамбараги ҳақида кетмоқда. Бироқ барча кузов панеллари, оптика, салоннинг қолган деталлари Lego’дан йиғилган.
Пластмасса Toyota GR Supra электродвигатель ёрдамида ҳаракатга келади. Маълум қилинишича, Lego спорткари соатига 28 километр тезликда ҳаракатлана олади, бироқ тормоз дискалари конструкциядан ясалгани сабаб унга ишониш керак эмас.
Эслатиб ўтамиз, июнь ойида Lego компанияси 400 мингта конструктор деталларидан таркиб топган тўлиқ ўлчамли Lamborghini Sian гиперкарини тақдим этганди. Уни яратиш устида 15 нафар мутахассис 8660 соат иш олиб борган. 1:1 масштабдаги ўйинчоқ гиперкар Lamborghini Sian FKP 37 модели дизайнини такрорлайди.
Изоҳ (0)