Токио—2020 Олимпиадасида софтбол бўйича мамлакат терма жамоаси таркибида ғолибликни қўлга киритган япониялик спортчи Миу Гото янги олдин медалга эга бўлади. Бунга топширилган олтин медални Нагоя шаҳрининг 72 ёшли мэри Такаши Кавамура тишлаб кўргани сабаб бўлган, деб хабар беради Esquire.
Мэр спортчи билан учрашувда коронавирус чекловларига риоя қилмаган ҳолда турган, олтин медални тақиб олиб, ниқобини ечган ҳолда мукофотни тишлаган.
Шундан сўнг шаҳар ҳокимлигига мэрнинг бу каби хатти-ҳаракатидан 7 мингдан ортиқ шикоят келиб тушган. «У спортчиларга ҳурматсизлик қилди. У спортчилар коронавирус сабаб ҳатто тақдирлаш маросимида ўз медалларини ўзлари ёки жамоадаги шериклари томонидан тақилганига қарамай, мукофотни тишлаб олди», — деб ёзади қиличбозлик бўйича Пекин ва Лондон Олимпиадаларида кумуш медални қўлга киритган Юки Ота.
Шунингдек, софтбол бўйича жамоага эгалик қилувчи Toyota компанияси ҳам мэрнинг бу ҳаракатини қоралаган.
Кейинроқ Кавамура қилган ишидан кечирим сўраб чиққан. «Мен Нагоя мэри лавозимида эканлигимни унутиб қўйдим ва оқилона иш тутмадим», — деган у. Шунингдек, мэрнинг айтишича, у медалнинг қайта алмаштирилишига кетадиган маблағни тўлаб бериш ниятида. Бироқ охир-оқибат харажатлар Халқаро олимпия қўмитаси томонидан қопланадиган бўлди.
Аввалроқ Олимпиадада олтин медални олган хитойлик спортчиларга Hongqi H9 лимузинлари совға қилиниши тўғрисида хабар берилганди.
Изоҳ (0)