Шанхайнинг Blossom Investment жамғармаси Тошкентдаги ёғ-мой комбинатининг бир қисмига даъвогарлик қилмоқда. Бу ҳақда E-auksion маълумотларига таяниб, Spot хабар берди.
Гап корхонанинг 25 миллиард сўмга баҳоланган ҳибсдаги қисми ҳақида кетмоқда. Тегишли лот Мажбурий ижро бюроси бўлими томонидан июль охирида аукционга қўйилган.
Лот остидаги изоҳда ёзилишича, бинонинг бир нечта блокига ҳибс қўйилган, қарздорнинг ўзи суд тартибига кўра кўчирилади.
Аризалар 11 августга қадар қабул қилинган, савдолар эса 13 август куни бўлиб ўтган. Лотга фақат битта иштирокчи — Blossom Investment қизиқиш билдиргани сабаб аукцион шартларига кўра, унга лотни баҳолаш қийматида харид қилиш таклиф этилган.
Таъкидланишича, аукцион бўйича якуний қарор Давлат тендер комиссияси қарори асосида қабул қилинади.
Комбинатнинг хусусийлаштирилиши
Шу билан бирга, ҳозирда комбинатни хусусийлаштириш жараёнлари амалга оширилмоқда. Июль бошида корхонанинг бошқарув пакети 107,4 миллиард сўм қийматида сотувга қўйилганди.
Мазкур компанияда давлатнинг улуши 4 436 581 акцияни (56 фоиз) ташкил этади. Ҳар бир акциянинг номинал қиймати 1750 сўмни, бошланғич нархи — 24 225 сўмни ташкил этади.
Хусусийлаштириш жараёнида корхонанинг қарздорлик учун сотилаётган қисми ҳам ҳисобга олинган ёки олинмагани номаълум.
Мавзуга доир: Hyatt Regency Tashkent, Premier Hall, «Чотқол». Яна бир қатор объектлар сентябрдан сотувга қўйилади
Изоҳ (0)