Президент Шавкат Мирзиёев 13 август куни Токио Олимпиадасида иштирок этган спортчилар, совриндорларнинг оила аъзолари ва мураббийлари билан учрашди.
Сўз бошида Президент Ўзбекистон делегациясининг Олимпия ўйинларидаги улкан ғалабаси билан барчани табриклади.
«Аввало, сиз, азизларни, сизларнинг тимсолингизда бутун халқимизни Ўзбекистон миллий терма жамоасининг Олимпия ўйинларида қўлга киритган улкан, том маънода тарихий ғалабаси билан чин қалбимдан самимий муборакбод этаман. Ҳеч шубҳасиз, бу Ватанимиз мустақиллигининг 30 йиллик шонли байрамига муносиб совға бўлди.
Олимпиадада спортчиларимиз юксак шоҳсупаларга кўтарилиб, 3 та олтин ва 2 та бронза медални қўлга киритди. Мамлакатимиз жамоаси 200 дан зиёд давлатдан келган энг кучли спортчилар орасида умумжамоа ҳисобида – ўттиз иккинчи, Мустақил Давлатлар Ҳамдўстлигида – иккинчи, Марказий Осиёда эса – биринчи ўринни эгаллади. Бу чиндан ҳам ўзбек спорти тарихидаги улкан натижадир», — дея сўз бошлади Шавкат Мирзиёев.
Мирзиёев Токио Олимпиадаси совриндор бўлган спортчиларнинг ота-оналарига миннатдорчилик билдирди. Таэквондо бўйича олтин медални қўлга киритган Улуғбек Рашидовнинг отаси Исматилла Рашидов ҳамда онаси Оксана Даниленко, оғир атлетика бўйича Олимпия рекордини ўрнатиб, олтин медалга эга чиққан Акбар Жўраевнинг онаси Норматова Ҳафизахон, бокс бўйича оғир вазн тоифасида олий ўринни олган Баҳодир Жалоловнинг онаси Сабоҳат Жалолова, дзюдо бўйича бронза медал эгаси Давлат Бобоновнинг отаси Ҳусниддин Бобонов ва онаси Нурияхон Бобонова, эркин курашда бронза медални қўлга киритган Беҳзод Абдураҳмоновнинг отаси Муҳаммаджон Абдураҳмонов ва онаси Муҳаббатхон Абдураҳмоновага Президент томонидан ташаккур билдирилди.
«Мана шундай ботир ўғлонларни тарбиялаб вояга етказгани учун уларнинг ота-оналари ва устозларига чин юракдан ташаккур изҳор этамиз.
Бундай азми шижоатли, ватанпарвар ёшларимиз энг катта бойлигимиз, миллатимизнинг олтин фонди, десам, ўйлайманки, бутун халқимизнинг фикрини ифода этган бўламан», — дейди Мирзиёев.
Шавкат Мирзиёев Ўзбекистонда аёллар спорти ҳам жадал ривожланаётганини қайд этди.
«Яна бир муҳим жиҳати – аёллар ўртасида спортни ривожлантириш мақсадида амалга ошираётган катта ишларимиз ижобий натижа бермоқда. Буни 28 нафар спортчи хотин-қизларимиз Токио Олимпиадасига йўлланмани қўлга киритгани ҳам тасдиқлайди. Таъкидлаш керакки, бу мустақил Ўзбекистон тарихидаги рекорд натижадир. Боксчи қизларимиз илк бор Олимпиадага 3 та йўлланмани қўлга киритди.
Бу галги Олимпиада биз учун спорт оламида бир қатор янги истеъдод соҳибларини, янги Ўзбекистоннинг янги қаҳрамонларини кашф қилиб берганини таъкидлаш лозим. Хусусан, 18 ёшли спортчи қизимиз, қорақалпоқ элининг муносиб фарзанди Зайнаб Дайибекова қиличбозликнинг сабля йўналиши бўйича Ўзбекистон тарихида биринчи марта Олимпиада қатнашчиси деган шарафга сазовор бўлди. У мусобақаларнинг иккинчи даврасида Осиё ўйинларининг финалчиси, дунё рейтингида 3-ўринда бораётган хитойлик тажрибали спортчини мағлуб этди.
Ўн тўққиз ёшли Кумушхон Файзуллаева эса 76 килограммгача вазн тоифасидаги қизлар ўртасида оғир атлетика баҳсларининг энг ёш иштирокчиси сифатида эътироф этилди. Шунингдек, умидли боксчимиз Турсуной Раҳимова ҳамда Олимпиада ўйинларида оғир атлетика бўйича янги рекордни ўрнатган қизимиз Муаттар Набиеванинг чиқишлари ҳам ҳеч кимни бефарқ қолдирмади.
Ҳурматли дўстлар, мана, кўриб турибсизлар – Ўзбекистоннинг жасур спортчи қизлари халқаро майдонларга дадил кириб келмоқда. Барчамиз уларга чин қалбдан тасанно айтамиз.
Айни вақтда мен спортчи йигитларимизга қараб айтмоқчиман: агар қаттиқ ғайрат қилмасангиз, қизларимиз ҳадемай сизлардан ўтиб кетади», — дейди Президент.
Фаолияти мобайнида саккиз марта Олимпиадада қатнашган, гимнастиканинг ўзбекистонлик афсонавий вакили Оксана Чусовитина Президент томонидан «Ўзбекистон Республикасида хизмат кўрсатган спорт устози» фахрий унвони билан тақдирланди.
«Ҳаётини спортга, бундай йирик мусобақада муваффақиятга эришишдек мақсадга бағишлаш учун зўр ирода ва фидойилик керак, десак айни ҳақиқатни айтган бўламиз. Бундай афсонавий спортчимиз билан ҳақли равишда фахрланамиз. Унинг мардлиги, ғалабага бўлган қатъий интилиши ёш спортчиларимиз учун муваффақият ва шуҳрат қозонишнинг ўзига хос ибрат мактаби бўлиб хизмат қилмоқда.
Ҳурматли Оксана Александровна, Ватанимизга бўлган меҳрингиз ва садоқатингиз, спортдаги фидойилигингиз, букилмас ирода ва матонатингиз учун сизга яна бир бор катта миннатдорчилик билдираман», — деди Президент.
Мирзиёев Токио—2020 Олимпиадаси совриндорлари қаторида уларнинг мураббийлари, шунингдек, мусобақада иштирок этган ҳар бир спортчи пул мукофоти билан тақдирланиши маълум қилди.
Олимпиада олтин медали соҳиблари – 200 минг АҚШ доллар, бронза медали эгалари – 50 минг АҚШ доллар мукофот пули билан тақдирланди. Олимпия чемпионларининг мураббийлари 40 минг доллар, бронза медал соҳибларининг мураббийлари эса 20 минг доллар билан мукофотланди. Олимпия ўйинларида қатнашган ҳар бир спортчи 5 минг доллар билан рағбатлантирилди.
Президент Ўзбекистон Олимпиадада жамоавий спорт турларида оқсаётганини таъкидлади.
«Олимпия ўйинларида жамоавий спорт турлари бўйича сезиларли натижага эриша олмаганимизни очиқ тан олишимиз керак. Бу ҳол мутасадди раҳбарларни жиддий ўйлантириши зарур. Агар кимдир, бундан кейин ҳам олдинги Олимпия ўйинларида бўлгани каби, фақат яккакураш спорт турлари ҳисобидан ютуқларга эришамиз, деб ўйласа, адашади. Билиб қўйинглар, бу – мутлақо нотўғри ёндашув.
Бўлғуси Олимпиада олдидан футбол, баскетбол, гандбол, чим устида хоккей, регби, волейбол сингари жамоавий спорт турлари бўйича ҳам йўлланмаларни қўлга киритиш асосий мақсадимиз бўлиши зарур», — деди Мирзиёев.
Шавкат Мирзиёев навбатдаги Олимпиадага тайёргарлик кўриш кераклиги ҳақида гапирди ва легионер спортчиларни жалб қилиш амалиёти ўзини оқламаганини айтди.
«Парижда бўлиб ўтадиган навбатдаги ёзги Олимпиадага 100 дан зиёд лицензияни қўлга киритиш ва медаллар бўйича етакчи 15 та мамлакат қаторидан жой олиш учун ҳамма имкониятларимиз бор.
Ҳар бир ҳудуд кесимида Олимпиада ўйинларига ҳозирлик кўриш дастурларини ишлаб чиқиб, уни тизимли ташкил этиш керак. Спорт таълим муассасаларида Паралимпия бўлимларини ташкил этиб, уларга 10 фоиз қўшимча квоталар ажратиш яхши натижа бериши мумкин.
Спортчиларни ўқитишда ота-оналар томонидан пул тўлаш тартибини бекор қилиш зарур. Шунингдек, битирувчиларни олий таълим муассасаларига жисмоний тарбия ва спорт йўналишлари бўйича давлат гранти асосида тўғридан-тўғри иккинчи босқичга, имтиҳон синовларисиз қабул қилиш тизимини ҳам жорий этишимиз керак.
Шу ўринда катта харажатлар эвазига хориждан спортчиларни (легионер) олиб келиш тажрибаси унчалик ҳам ўзини оқламаётганини очиқ айтишимиз керак. Бундай амалиётдан воз кечиб, маҳаллий спортчиларимизни тарбиялашга жиддий эътибор қаратадиган пайт келди.
Хориждан легионерлар эмас, етук мутахассисларни ҳамда спортчиларни тайёрлаш методикасини олиб келиш керак», — деди Мирзиёев.
Шунингдек, Президент паралимпиячилар фаолиятига ҳам тўхталиб ўтди. Унда давлат раҳбари халқаро майдонда совриндор бўлган ёш паралимпиячилар пул мукофотлари билан тақдирланишини маълум қилди.
«Ўсмирлар ва ёшлар ўртасидаги жаҳон мусобақаларининг ғолиб ва совриндорларини ҳамда уларни ана шу мусобақаларга тайёрлаган мураббийларни ҳам рағбатлантиришни кенгайтирамиз.
Бунда олтин медал совриндорига – 3 минг доллар, мураббийига – 2 минг доллар, кумуш медал соҳибига – 2 минг доллар, мураббийига 1 минг доллар, бронза медали учун – 1 минг доллар, мураббийига – 500 доллар миқдорида мукофот пули берилади.
Бундан ташқари нуфузли халқаро чемпионатлар ғолибларининг устозлари «Ўзбекистонда хизмат кўрсатган ёшлар мураббийси», «Ўзбекистонда хизмат кўрсатган спорт устози» фахрий унвонлари билан тақдирланади»
Шавкат Мирзиёев ўзбекистонлик паралимпиячиларга бўлажак мусобақаларда омад тилади.
«Биз бундан буён Олимпия ва Паралимпия спортини яхлит бир тизим сифатида кўрамиз, улар учун кенг шароит ва имкониятлар ҳамда рағбатлантириш тизимини яратамиз.
Хабарингиз бор, 24 август куни Токиода ёзги Паралимпия ўйинлари бошланади. Ушбу нуфузли мусобақада ҳам вакилларимиз муваффақиятли иштирок этиб, Ватанимиз шаънини муносиб ҳимоя қиладилар, деб ишонамиз.
Бугунги тантанали маросимда бир гуруҳ паралимпия спортчиларимиз ҳам қатнашмоқда. Фурсатдан фойдаланиб, бўлғуси мусобақаларда уларнинг барчасига омад ва зафарлар тилаб қоламиз», — деди Мирзиёев.
Изоҳ (0)