Ўзбекистон Халқ демократик партияси сайловолди дастурига ишсизлик, уй-жой муаммоси, озиқ-овқат маҳсулотларининг нархи назоратсиз ошиб кетишининг олдини олиш каби қатор масалаларни киритган. Бу ҳақда 7 август куни бўлиб ўтган ХДП марказий кенгашининг навбатдан ташқари пленумида партия томонидан президентликка номзод сифатида тавсия этилган Мақсуда Ворисова маълум қилди, дея хабар бермоқда «Дарё» мухбири.
«Президентлик сайловига ўз дастуримиз билан кириб боряпмиз. Бугунги кунда жуда долзарб бўлиб турган глобал ўзгаришлар, пандемия даврида юзага келган иқтисодий танглик оқибатида халқнинг камбағаллашиб кетишининг олдини олиш, жамиятдаги камбағалликни қисқартириш, аҳолига иш ўринлари яратиш ва, айниқса, аёллар масаласини ҳал қилиш, хотин-қизлар бандлигини таъминлаш, уларнинг манфаатларини ҳимоя қилиш бўйича аниқ вазифаларни ўз олдимизга қўйганмиз ва уларни амалга ошириш учун, албатта, кураш олиб борамиз», — деди у.
Ворисова ўз мақсадлари ҳақида қисқача гапиргач, тадбирдан сўнг ОАВ вакилларига интервью берди.
– Президентлик сайловларидан нимани хоҳлаяпсиз ёки орзу қиляпсиз?
— Биргина мен эмас, кўп минг сонли Халқ демократик партияси ҳам сайловда ғалаба қозонишни ва ўзининг дастурий вазифаларини амалга оширишни нафақат орзу, балки мақсад ҳам қилиб қўйган.
— Ўзбекистон бошқарувини аёл кишига топширилишига ва халқнинг ишонишига кўзингиз етяптими?
— Бу шахсга нисбатан бўлган ишонч эмас, бу партиянинг ғоялари, мақсадлари ва дастуримизга бўлган ишонч. Халқ биздан уни бугун қийнаб турган муаммоларини тизимли ҳал қилишимизни кутмоқда. Сайловолди дастуримиз орқали ишсизлик, уй-жой муаммоси, коммунал хизматлардаги тарифлар ёки озиқ-овқат маҳсулотларининг нархи назоратсиз ошиб кетишининг олдини олмоқчимиз.
— Ғолиб бўлсангиз, ислоҳотларни нимадан бошлайсиз?
— Юқорида қайд этганимдек, биринчи навбатда, ишсизлик ва бандлик масаласи, аёлларимизни қийнаб турган муаммоларга ечим топиш ва, албатта, таълим ҳамда тиббиёт соҳасидаги аҳолимиз дуч келаётган долзарб масалаларни ҳал қилишдан бошлайман.
— Сизнинг номзодингиз кўрсатилишида гендер тенглик омили ҳисобга олинган, деб ўйлайсизми? Чунки кўпчилик катта эҳтимол билан партия етакчиси Улуғбек Иноятовнинг номзоди қўйилса керак, деган фикрда эди. Аммо кутилмаганда сизнинг номзодингиз эълон қилинди.
— Партиямизда гендер тенгликка доимо эътибор берилган. Мен фақат аёл бўлганим учун номзод қилиб кўрсатилмадим. Шу халқ орасидан чиққан оддий бир она ва аёл бўлганим сабабли ҳам, халқимизнинг қуйи қатламини қийнаб турган муаммоларни ичидан билганим учун ҳам, мени номзод сифатида кўрсатишди, деб ўйлайман.
— Давлат органларида аёл амалдорларнинг камлигига муносабатингиз қандай?
— Биринчи ўринда мутахассисларни тўғри танлашга эътибор қаратишимиз керак. Тан олишимиз керак, шу кунгача кўпроқ эркак мутахассисларга имконият берилди. Гендер тенглик деганда, биз нафақат маълум бир касбларнинг аёл киши томонидан танланишини ёки унинг лавозимга тайинланишида аёл бўлгани учун эмас, унинг тажрибаси, савияси ва билимига эътибор берилишини ўз дастуримизда ҳам кўрсатиб ўтамиз.
— Статистика қўмитасининг ҳисоботига кўра, Ўзбекистонда аҳолининг ўртача маошидан 20-30 фоиз камроқ пул топадиган иккита соҳа вакиллари бор: тиббиёт ва таълим соҳаси ходимлари. Бу вазиятни ўзгартириш бўйича аниқ мақсадларингиз борми?
— Дастуримизда бу масала, албатта, кўрсатиб ўтилган. Ушбу соҳаларни етарлича маблағ билан таъминламасак, бугун ҳамманинг тилида бўлган таълим ва соғлиқни сақлашда коррупция урчиган, деган сўздан кетиб қола олмаймиз. Албатта, биз бу икки соҳа ходимларини муносиб иш ҳаққи билан таъминлашимиз шарт.
Изоҳ (0)