Сингапурда дунёда энг эрта туғилган чақалоқ бир йиллик даволанишдан сўнг шифохонадан чиқди. Қизча дунёга келганида 212 гр эди

Сингапурда дунёдаги энг эрта туғилган чақалоқ ҳисобланувчи Ю Сюанга 13 ойдан сўнг касалхонадан чиқишига рухсат берилди, деб ёзади Esquire.

Қизалоқ ҳомиладорликнинг 25-ҳафтасида туғилган ва ўша вақтда унинг оғирлиги 212 граммни ташкил этган. Аёва университетининг энг митти болалар реестри маълумотларига кўра, бундан олдинги рекордчи АҚШда қайд этилган бўлиб, 2018 йили мамлакатда 245 граммли қизча туғилган.

Ю Сюаннинг онасида прееклампсия — артериал босимнинг хавфли кўтарилиши аниқлаганидан кейин аёл уни фавқулодда кесарча кесиш йўли билан тўрт ой олдин дунёга келтирган.

Сингапур Миллий университети шифохонаси шифокорларининг сўзларига кўра, қизчанинг «омон қолиш имконияти чекланган» бўлган. «Туғруқ вақтида қўйилган ташхисдаги асоратларга қарамай, у атрофдагиларни қатъиятлилиги ва ўсишга бўлган иштиёқи билан илҳомлантирди, бу эса уни COVID-19 даврининг ноодатий боласига — тартибсизлик орасидаги умид учқунига айлантирди», — дейди шифохонадагилар.

Қизчанинг соғлиғи ва ривожланиши яхши бўлгани сабаб унга шифохонадан рухсат берилган. Шу билан бирга, Ю Сюанда сурункали ўпка касаллиги кузатилмоқда, шу сабабли унга уйида нафас олишига ёрдам керак бўлади. Бироқ шифокорларнинг маълум қилишича, вақт ўтиши билан унинг аҳволи яхшиланиб боради.

Ю Сюаннинг ота-онасига шифохонада даволаниши учун кетадиган маблағни қоплашга краудфандинг кампанияси ёрдам берган — бир йиллик даволаниши учун 270 минг доллар тўпланган.