YouTube’даги Dobre Cars канали блогерлари Tesla Моdel Х электрокарини Британиянинг Jaguar двигатели билан жиҳозланган енгил танк билан ўзаро куч синаштирди. Иккита транспорт воситаси арқон тортишган. Беллашув якунида ғолиб номи яққол маълум бўлмаган — биринчи уринишда автомобиллар троссни тезда узиб юборган ва ташкилотчилари захира пўлат симдан фойдаланишга мажбур бўлган, деб хабар беради Motor.
CVR (Т) оиласига кирувчи танк Scorpio компанияси томонидан 1960 йилларда Буюк Британияда яратилган. У Фолкленд уруши, Босния можароси ва Форс кўрфазидаги уруш каби кўплаб ҳарбий ҳаракатларда иштирок этган.
Танк Jaguar компанияси томонидан ишлаб чиқилган олти цилиндрга эга 4,2 литрли двигатель ёрдамида ҳаракатга келади. Унинг қуввати 195 от кучига тенг бўлиб, тўғри йўлда танк соатига 80 километр тезликда ҳаракатлана олади.
Tesla Моdel Х электрокроссоверининг қуввати 772 от кучига тенг — бу ўз классидаги энг яхши кўрсаткичлардан бири ҳисобланади. Ушбу автомобиль «ақлли» ассистентлари, хавфсизлик ва ҳайдовчига ёрдам берадиган тизимлари сабаб дунёдаги энг юқори технологик машинадир.
Беллашув аввалида ташкилотчилар кичикроқ масофага дрег-пойга уюштирган ва табиийки бунда кроссовер ғалаба қозонган. Шундан сўнг транспорт воситалари арқон тортишишга киришган ва у дарҳол узилиб кетган. Ролик муаллифлари уни пўлат муқобилига алмаштириб, синовни давом эттирган. Аввалига Tesla Моdel Х олдинга ўтиб кетган, аммо бунга танк ҳайдовчисининг «хизмати» сабаб бўлган. Тўлиқ қувватда беллашувга киришган танк Tesla’га ҳеч қандай имконият қолдирмаган.
Аввалроқ Defender, G-Class ва Jeep Wrangler ўзаро арқон тортишгани тўғрисида хабар берилганди.
Мавзуга доир: Видео: Hummer ва «Гелендваген» ўзаро арқон тортишди
Изоҳ (0)