Ўзбекистонда июнь ойида умумтаълим фанларидан миллий сертификат учун ўтказилган тест синовларининг саволлари олдиндан тарқаб кетгани маълум бўлган эди.
11 июнь куни Telegram’даги «TentakMinds» канали Бухоро вилоятида кимё ва биология фанлари бўйича миллий тест тизими топшириқлари (саволлари) тарқалиб кетгани ва Давлат тест маркази (ДТМ) томонидан текширув олиб борилаётгани ҳақида хабар тарқатган эди. 5 август куни Давлат тест маркази биология фанидан тест синовларида тестология мезонлари бузилганини маълум қилди.
Эслатиб ўтамиз, 11 июнь куни аноним блогер томонидан юритиладиган «TentakMinds» канали Бухоро вилоятида умумтаълим фанлари бўйича миллий тест тизими топшириқлари (саволлари) тарқалиб кетгани ва Давлат тест маркази (ДТМ) томонидан текширув олиб борилаётгани ҳақида хабар тарқатди. Кейинчалик ушбу канал биология ва кимё фанларидан тарқалиб кетгани даъво қилинаётган тест топшириқларини эълон қилди. Журналист Хуршид Далиев ҳам ўз каналида Бухорода тест топшириқлари жавоблари тест ўтказилишидан бир кун олдин ёдлатилиши ҳақида ёзди.
ДТМ расмий баёнотида мазкур тест топшириқларининг ҳақиқатан ҳам миллий тест тизимига оид эканини тан олди. Шу билан бирга, ДТМ баёнотига кўра, тест топшириқлари Халқ таълими вазирлиги ва Таълим сифатини назорат қилиш инспекцияси томонидан ишлаб чиқилган ва Давлат фелдегерлик хизмати ходимлари томонидан тест синови ўтказиладиган биноларга махсус транспорт воситалари орқали махфийлик таъминланган ҳолда тест синови бошланишидан бир соат олдин етказилган.
5 август куни Давлат тест маркази биология фанидан тест синовларида тестология мезонлари бузилганини маълум қилди.
10 июнь куни Қорақалпоғистон Республикаси, вилоятлар ва Тошкент шаҳрида биология (2 473 нафар) фанидан миллий сертификат учун тест синовлари бўлиб ўтган.
Қайд этилишича, мазкур тест синови натижалари Давлат тест маркази томонидан ҳисобланиб, таҳлил қилинганда биология фанидан тест топширувчилар балларининг частота тақсимотида нормал тақсимотдан катта оғишлар мавжуд экани аниқланган. Яъни биология фани бўйича тест натижалари таҳлили тестология мезонлари бузилганини, аниқроқ қилиб айтганда натижалар айрим ҳудудларда жуда юқори эканлигини кўрсатган.
ДТМ таъкидлашига кўра, 10 июнь куни биология фани бўйича тест синовида иштирок этган барча талабгорларнинг тўлови тўлиқ қайтарилади.
«Тест топширганлар барча абитуриентлар каби ОТМларга кириш тест синовларида мутахассислик фанларининг ҳар биридан 20 та тест топшириғи (миллий сертификат имтиҳонидаги 50 та тест топшириғи ўрнига) ва 1 соатдан вақт берилиши белгиланди», — дейилади хабарда.
Маълумот учун, умумтаълим фанларини билиш даражасини баҳолашнинг миллий тест тизими учун тест синовлари Ўзбекистоннинг барча ҳудудларида 2021 йил 9–10 июнь кунлари ўтказилган. Тест синовидан ижобий натижага эришган талабгорга тест синови натижалари эълон қилинган кундан бошлаб бир ҳафта мобайнида Давлат тест маркази директорининг буйруғи асосида электрон шаклда сертификат берилади.
Ушбу сертификатга эга бўлган абитуриентга сертификатдаги ўзлаштириш фоизига мос равишда олий таълим муассасаси бакалавриатига ўқишга қабул қилиш бўйича тест синовларида ушбу фандан белгиланган максимал баллга нисбатан табақалаштирилган (пропорсионал) балл берилади.
Изоҳ (0)