Тишларни қандай парвариш қилиш керак?

Тишлар нафақат инсон организми, балки  ташқи кўриниши учун ҳам муҳим аҳамиятга эга. Улар оппоқ, текис ва албатта, соғлом бўлиши учун бир неча қоидаларга амал қилиш кифоя. Стоматолог Саидолимхўжа Саидрасулов тишни парвариш қилиш билан боғлиқ оддий ва самарали тавсиялари билан бўлишди.

Стоматолог Саидолимхўжа Саидрасулов тишни парвариш қилиш билан боғлиқ тавсиялари билан бўлишди. 

Тишларингизни кунда уч марта ювинг

Тишнинг гигиеник ҳолатини яхши сақлаш учун, аввало, тишни ётишдан олдин, эрталаб ва нонуштадан кейин ювиш шарт.

Ҳозирги кунда мутахассислар агар киши 3 маҳал овқат еса, 3 марта тишни ювиш керак деган фикрни олдинга суряпти. Аксарият европаликлар буни одатга айлантирган.

Мен мижозларимга ҳеч бўлмаганда икки маҳал, айниқса, ётишдан олдин тишингизни ювинг, деб тайинлайман. Сабаби, масалан, одам йўқ деганда 7 соат ухлайди. Агар тиш ювилмаса, оғиз бўшлиғида қолиб кетган овқат қолдиқлари 7-8 соат ичида нималар бўлмайди дейсиз?

Тишни даволатишдан олдин ички факторларни йўқ қилинг

Энг ёмони, бу томоққа ҳам таъсир қилади. Аксарият одамлар кўп томоғи оғрийдиган, ангина бўлиб қолади. Уларни кузацангиз, аксари ётишдан олдин тишини ювмайди.

Қўпол бўлса ҳам айтаман, бойлар олдинлари қул ёки от, қўй олаётганда тишига қараб олишган. Чунки тишга қараб организмнинг ҳолатини билишган.

Бир куни бир аёл қабулимга лингивид милкларини тозалатгани келди. Кўп стоматологларга борганини, аммо ҳеч шифо топмаётгани ҳақида гапирди. Текширтирдингизми, десам, нимани текширтираман, деб ҳайрон бўлди.

Аввало, ошқозон-ичак тизимини яхшилаб текширтириш лозим, сизда аутизм, ошқозон яраси ёки бўқоқ бўлиши мумкин, дедим. У аёл «ошқозонимдан шикоятим йўқ» деб қайтиб кетди.

Орадан бироз вақт ўтиб у аёл яна келиб, гапимдан сўнг шифокорга бориб текширтирганини, мен айтган аъзоларида муаммо чиққанини айтди.

Ҳар 6 ойда шифокорга кўрининг

Қабулимга 18-20 ёшлилар келади. Аксариятининг тиши қолмаган. Аслида, 18 ёшда 28 та тиш бўлиши керак. Борларининг ҳам камида 20 та тишида муаммо бор. Бу дегани яхши ювмас экан яхши парвариш қилмас экан, дегани эмас.

Тўғри, гигиенани яхши ушламаган, лекин асосий сабаб ошқозондан. Тишни даволатиш билан касалликка сабаб бўлган ички факторларни бартараф қилган маъқул.

Одамлар тишида муаммо бўлса-бўлмаса, ҳар олти ойда стоматологга келиб текширтириб туришларини маслаҳат берган бўлардим.