Дания терма жамоаси ярим ҳимоячиси Кристиан Эриксен ушбу ёзда бутун дунёни қўрқитиб юборди. Ҳозирда у тикланиш жараёнини ўтказмоқда ва ҳаммаси жойидадек таассурот уйғонмоқда, аммо катта эҳтимол билан дефибриллятор ўрнатилгач, «Интер» ярим ҳимоячиси А Серияда ўйнай олмаса керак. Бу ҳақда Италия футбол федерацияси Илмий-техник қўмитаси аъзоси Франческо Браконаро маълум қилди.
«Кристиан Эриксеннинг Италияда ўйнашига розилик бериб бўлмайди. Агар футболчидан кардиовертер-дефибриллятор олиб ташланса ва патологиянинг бартараф этилгани тасдиқланса, у яна «Интер»да ўйнаши мумкин бўлади», – дейди Франческо Браконаро.
Коронавирус пандемияси сабабли Илмий-техник қўмита ҳозирда Италия ҳукумати ҳузурида фаолият олиб бормоқда ва мамлакатда спортни ривожлантириш чораларини таклиф қилмоқда. Ҳозирда қўмита Эриксен билан содир бўлган воқеани таҳлил қилмоқда.
Агар Эриксен ва унинг шифокорлари кардиовертер-дефибрилляторни олиб ташламасликка қарор қилса ҳамда футболчи фаолиятини давом эттирмоқчи бўлса, у бошқа вариантларни излаши керак бўлади. Нидерландия чемпионатида дефибриллятор билан ўйнаш тақиқланмаган. Масалан, «Аякс» ва Нидерландия терма жамоаси футболчиси Дейли Блинд ҳам дефибриллятор билан ўйнаб келади. Дарвоқе, Кристианнинг профессионал фаолияти ҳам айнан Амстердамда бошланган.
Қуйида Кристиан Эриксеннинг ушбу ёзни қандай ўтказгани ҳақида қисқача ҳикоя қилинади:- Дания терма жамоаси футболчиси Евро—2020 гуруҳ босқичида Финляндияга қарши ўйин пайтида майдоннинг ўзида ҳушидан кетди. Тиббий гуруҳ уни қутқариш учун дефибриллятордан фойдаланди;
- Эриксеннинг бахтига майдонда германиялик реаниматолог бор эди: даниялик шифокорлар шошиб қолган ва юрак тўхтаб қолганда қандай ҳаракат қилишни билмаётган бир вақтда реаниматолог Эриксеннинг ҳаётини сақлаб қолди. Ярим ҳимоячи майдонда ўзига келди ва дарҳол касалхонага ётқизилди;
- Касалхонада данияликка кардиовертер-дефибриллятор қўйилди, мослама юрак аритмияларини бартараф қилади;
- Кристиан 18 июнь куни муваффақиятли операция қилинди ва шифохонадан чиқарилди. La Gazzetta dello Sport нашри яхши сценарий бўйича ярим ҳимоячи бир неча ойдан сўнг майдонга қайтиши мумкинлигини маълум қилганди.
Хўш, ҳозир унинг аҳволи қандай?
Tuttosport хабарига кўра, Кристиан июль ойининг бошида Миланга қайтган. Келаётган ҳафтада у жамоадошлари ва янги мураббий Симоне Инзаги билан учрашади. Кейинчалик даниялик яна тиббий кўрикдан ўтишни режалаштирган.
Бир неча ҳафта олдин Инзаги ярим ҳимоячини жамоада нима кутаётгани ҳақида гапирганди.
«Мен Евродан олдин Эриксен билан гаплашгандим. Уни режаларимга киритганман. Кристианнинг қайтишга вақти бор, биз уни қучоқ очиб кутиб қоламиз», — дейди мураббий Football Italia нашрига берган интервьюсида.
Унинг «Интер»даги яна бир шериги Стефан де Врей эса ярим ҳимоячи ҳақида шундай деганди:
«Мен Эриксен билан ўша вазиятдан кейин гаплашдим ва у ҳақида узоқ ўйладим. Шундан сўнг уни бошқа безовта қилмадим, чунки у жуда кўп хабарларни қабул қилаётган бўлса керак. Формага қайтиши учун унга вақт керак».
Кристианни Миландаги мухлислари ҳам унутмади: 10 июль куни «Интер» Аппьяно-Жентиле шаҳридаги машғулот базасида мавсумолди тайёргарликларни бошлади, у ерда футболчиларни кутиб олиш учун мухлислар ҳам чиқди ва данияликни қўллаб-қувватлаш мақсадида қўшиқ куйлади.
Бироқ энди уни яна «Интер» либосида кўриш амримаҳол.
Изоҳ (0)