27 июль куни Инсон ҳуқуқлари бўйича вакилининг (Омбудсман) 2021 йилнинг ўтган олти ойидаги фаолияти сарҳисобига бағишланган йиғилиши бўлиб ўтди, деб хабар беради «Gazeta.uz».
Омбудсман Феруза Эшматованинг сўзларига кўра, 6 ой ичида Ўзбекистон ва хорижий давлатлар фуқаролари, омбудсманлар, фуқаролиги бўлмаган шахслар ва бошқалардан жами 9632 та мурожаат келиб тушган. Бу 2020 йилнинг мос даврига нисбатан 32,3 фоизга (6484 та) кўп.
Шундан 723 таси шахсий қабулларда, 83 таси сайёр қабулларда, 3812 таси почта ва телеграф, 1580 таси ишонч телефони, 303 таси жазони ижро этиш муассасаларидаги омбудсманга мурожаат қутилари, 83 таси Президентнинг виртуал қабулхонаси ва яна 1494 таси интернет орқали келиб тушган. Қолган 1554 та мурожаат аноним ва мазмунан такрорийлардан иборатлиги айтилган.
«Мурожаатларнинг 40 фоизга яқини фуқароларнинг шахсий ҳуқуқ ва эркинликларига тегишли. 30,4 фоизга яқини ижтимоий ҳуқуқларга, 24 фоизи иқтисодий ҳуқуқларга, 5 фоизга яқини сиёсий ҳуқуқларга ва 1 фоизга яқини экологик ҳуқуқларга тегишли бўлган мурожаатлардир», — деди у.
Бугунги кунда назоратга олинган мурожаатларнинг 30 фоизга яқини ўз ечимини топаётгани маълум қилинган.
«Сизда ‘нима учун атига 30 фоизи?’ деган савол туғилиши мумкин. Айтишимиз керакки, омбудсман ваколатига тегишли бўлган ва назоратга олинган мурожаатларнинг 30 фоизи ижобий ҳал бўлган. Агар энг ривожланган демократик мамлакатларнинг омбудсмани фаолияти ва мурожаатлар билан ишлаши самарадорлигига эътибор қаратадиган бўлсак, энг яхши натижа 22 фоиздан 30 фоизгача эканлигини кўришимиз мумкин», — дейди омбудсман.
Бундан ташқари, мурожаатларнинг кўриб чиқилиши натижасида 13 та жиноий, 4 та маъмурий ва 8 та интизомий иш қўзғатилган. Масъул мансабдор шахсларнинг ҳаракатларига ҳуқуқий баҳо бериш учун 23 та текширув ўтказилиб, 16 нафар давлат идоралари ходими турли даражадаги жавобгарликларга тортилган.
Суд қарорларига нисбатан 2 та протест киритилди ҳамда мурожаат қилувчилар манфаатларини кўзлаб, жиноят иши қўзғатишни рад этиш тўғрисидаги 26 та қарор бекор қилинган.
Таъкидланишича, судларга фуқароларнинг 107,4 миллион сўм меҳнат ҳақини ундиришга қаратилган 8 та даъво аризаси киритилиб, 24 нафар фуқарога 345,8 миллион сўмлик меҳнат ҳақи тўланиши таъминланган.
10 дан ортиқ фуқаро ишга тикланди, 2 нафар фуқаро иш жойида меҳнат қобилиятини йўқотганлиги учун 4,4 миллион сўмлик соғлиғига етказилган зарар ундирилган.
Йиғилишда, шунингдек, фуқароларга 108 миллион сўмлик кредитларни расмийлаштиришда кўмаклашилгани, мурожаат этувчилар фойдасига суд қарорларида белгиланган 164,8 миллион сўмлик зарар ундирилгани айтилган.
Давлат ва жамоат эҳтиёжлари учун ер участкаларининг олиб қўйилиши («снос») муносабати билан 9 фуқарога уй-жой ажратилишида ёрдам берилган. Тадбиркорларга 135 миллион сўмлик ортиқча тўланган солиқни қайтаришда кўмак кўрсатилган.
Аввалроқ омбудсман бошчилигидаги экспертлар гуруҳи Зангиотада жойлашган аёллар колониясининг шароитлари билан танишгани, Ўзбекистонда маҳкумларнинг омбудсманга йўллаган шикоятини қамоқхона раҳбарияти кўздан кечириши тақиқланиши мумкинлиги тўғрисида хабар берилганди.
Изоҳ (0)