Шон-шуҳрат қиймати: «Зорро» юлдузи Кетрин Зета-Жонс машҳурлик учун қандай товон тўлаган?

Экранларда кўриниши биланоқ «инглиз атиргули» деб атала бошлаган Кетрин Зета-Жонс нафақат соҳибжамоллиги, ишга бўлган лаёқати ва ўзини тутиши сабаб атрофдагиларнинг эътиборига сазовор бўла бошлаган. Ҳаракатдан тўхтамаган ва шунга яраша муваффақият чўққисини забт этишга эришган актрисанинг ҳаёти билан боғлиқ маълумотларни эътиборингизга ҳавола қиламиз.

Актрисалик қобилияти тўрт ёшидаёқ намоён бўла бошлаган қизалоқ

Болалиги, тўғрироғи, тўрт ёшиданоқ Суони шаҳридаги черковга кираверишда қўшиқ куйлаган Кетрин кейинроқ маҳаллий театрдаги постановкада роль ижро қилган. Шунингдек, рақс билан шуғулланишни канда қилмаган. У актриса бўлишни шунчаки истаб қўл қовуштириб ўтирмаган, мақсади сари шахдам қадам ташлашдан тўхтамаган. Мактаб маъмуриятидан 15 ёшда битирув имтиҳонларини топширишга рухсат олганидан кейин Лондонга жўнаб кетган. Пойтахтга борганидан кейин телешоуда иштирок эта бошлаган ва у ердаги фаолияти давомида Кетринга «42-кўча» мюзиклида иштирок этиш таклиф қилинган. Дебюти омадли чиққанидан кейин бир неча лойиҳаларда суратга тушган.

Тартиб-интизом

Актриса эришган муваффақиятлари сирини қатъий тартиб-интизом билан боғлайди. У 11 ёшидан бошлаб ҳар куни кечаси кундалигига эртанги кун билан боғлиқ режаларини ёзиб чиққан. 24 соат давомида қилиниши керак бўлган ишларни аввалдан режалаштирган. 24 ёшида «Майнинг дилрабо ғунчалари» фильмидаги роли учун Голливудда эътироф этилган. Бутун дунёда машҳурликка эришган актриса ўз орзусига эришган.

Машҳур жуфтлик

«Титаник»нинг 1996 йилда суратга олинган версияси ва «Зорро ниқоби» фильмларидаги ижросидан кейин эса машҳурлиги тобора ортиб борган. Шундан кейин унинг актёр ва продюсер Майкл Дуглас билан ишқий муносабатлари ҳақида миш-миш тарқалган. Етарлича танилиб улгурган, мафтункор актрисанинг ёши катта одамга кўнгил қўйгани кўпчиликни ҳайрон қолдирган. Турли гап сўзларга қарамасдан жуфтлик турмуш қурган ва бир-бири билан бахтли эканини оммадан яширмаган. Юлдузга айланиб улгурган актрисага роллари учун миллионлаб гонорар тўланган, ўзи ишлашни истаган лойиҳаларни хоҳишига қараб танлайдиган даражага етган. 2002 йилда «Чикаго» мюзиклидаги ижроси туфайли «Оскар» мукофотига лойиқ деб топилганида иккинчи фарзандига ҳомиладор бўлган.

Қамоқ, саратон ва депрессия

Жуфтликнинг бахт ва қувончларга тўла ҳаёти 10 йилгина давом этган холос. Шундан кейин қора кунлар бошланган. Дастлаб Дугласнинг биринчи турмушидан бўлган фарзанди — Кемерон наркотик моддалар савдосида айбланиб қамоққа олинган. Шу 2010 йилнинг ўзида Майклга ҳиқилдоқ саратони ташхиси қўйилган. Бу вақтда Кетрин турмуш ўроғини бир дақиқа ҳам ёлғиз қолдирмаган, кимётерапиядан кейин лоҳас бўлиб қолган Дугласни парвариш қилган. Орадан бир йил ўтиб жуфтлик хушхабар: касаллик енгилгани, Майкл суратга тушишга ҳозир эканини маълум қилган. Ҳаммаси изига тушгандек туйилган бир вақтда Кетриннинг саломатлигида муаммо кузатила бошлаган. Сўнгги йиллардаги зўриқишлар жиддий психологик касаллик келиб чиқишига сабаб бўлган. Депрессия хуружлари безовта қилган актрисанинг аҳволи шунчалик ёмонлашганидан руҳий клиникага ётишига тўғри келган. Ўзига бўлган ишончи йўқолган ва ўзини кучсиз ҳис қилган Кетрин актрисалик карьерасига нуқта қўйиш ҳақида ҳам ўйлаб кўрган ҳатто. Аввалига қўллаб-қувватлаган умр йўлдоши 2013 йилда у билан ажрашишга қарор қилган. Дуглас рафиқасининг доимий депрессияда эканидан чарчаганини айтган.

Ажрашиш фикрининг ўзгариши ва ҳаётга қайтиш

Бир неча ойдан кейин жуфтликнинг айрилмасдан ҳаммасини бошидан бошлаб кўрмоқчилиги ҳақидаги қарори мухлисларни ҳайратда қолдирган. Табиийки, бу осон бўлмаган. Кетриннинг ўзини яхши ҳис қила бошлашига севимли иши сабабчи бўлган. «Кокаиннинг чўқинтирган онаси» фильмида машҳур наркобарон хоним Гризелда Бланкони гавдалантирганидан кейин актриса ўзини яна керакли ҳис қилган ва ҳаётга бўлган қизиқиши ортган.

«Ўзини ўзи хўрлаш керакмаслиги ҳаётнинг энг асосий дарси. Мен ҳамиша тақдир зарбаларини тавозе билан қабул қилиш ва ўз муваффақиятларимдан хижолат бўлишга уринганман. Аммо камтар бўлиш ҳамда бойлигим, машҳурлигим, гўзаллигим, юлдузнинг рафиқаси эканим ҳамда турмуш ўртоғимнинг оиласи анча вақтдан буён Голливудда обрўли экани сабаб ўзимни оқлаш жонимга тегди. Мен оиламни, эрим, ажойиб фарзандларим ва ўз ишимни яхши кўраман. Қувончли ва бахтли лаҳзалар ҳали олдинда деб, умид қиламан. Турмуш ўртоғим у ҳақида чексиз жирканч ғийбатлар тарқалганига қарамай, бахтли ва саломат. Мен ўзимдаги барча фаровонликларга муносибман», — деган у 2017 йилда журналистларга берган интервьюсида.

Испанияда қуёш ботиши

https://www.instagram.com/p/CP84NTIHA60/

Ҳаёт синовларини, яхши ва ёмон кунларни бошдан кечирган жуфтлик ҳали-ҳамон бирга. Йиллар ўтгани сайин муносабатлари мустаҳкамланиб, бир-бирини янада яхши тушунишни ўрганган машҳурларнинг икки нафар фарзанди аллақачон вояга етган ва карьерасини бошлаб улгурган. Ёши элликдан ошган актриса вақтини оиласи билан Испаниядаги уйида ўтказишга ҳаракат қилади. Сўнгги вақтларда камдан кам ҳолларда суратга тушиши ва интервью беришни жини унчалик суймаслигига қарамай, у қуёш ботишини суратга олишни канда қилмайди. Ҳар бир янги кун ботиши ва тонг отишини такрорланмас янги имкон деб билса не ажаб.