Қирғизистон президенти Садир Жапаров 23 июль куни коронавирусга қарши вакцина қабул қилди. Бу ҳақда Kloop хабар берди.
Вакцинациядан сўнг Жапаров фуқароларни ундан ўрнак олиб, коронавирусга қарши эмланишга чақирди. Жапаров Хитойда ишлаб чиқарилган Sinopharm вакцинасининг биринчи дозасини олди.
Бунгача президент матбуот хизмати Жапаров эмланмагани, чунки унда антитаналар миқдори юқори экани ҳақида хабар берган эди. Кейинроқ Соғлиқни сақлаш вазирлиги раҳбари Алимқодир Бейшеналиев ҳам худди шундай баёнот берган. Бейшеналиев президентда антитаналар камаядиган бўлса, унга эмланишни таклиф қилишини қўшимча қилганди.
Қирғизистонда аҳолини эмлаш кампанияси 2021 йил март ойида бошланган. Аммо вакцинация 12 июлдан — мамлакатга Sinopharm вакцинасининг иккинчи партияси етказиб берилгандан сўнггина фаол босқичга кирди.
Шундан сўнг дарҳол Садир Жапаров муассасаларга қишлоқ кенгашларининг ижро органларигача барча давлат органлари ходимларини эмлашни буюрди. Шу билан бирга, бутун мамлакат бўйлаб 900 га яқин вакцинация пунктлари очилиб, уларда аҳолини бепул эмлаш йўлга қўйилди.
Ҳозирда Қирғизистонда уч турдаги вакциналар қўлланмоқда—-Хитойнинг Sinopharm, Россиянинг «Спутник V» ва AstraZeneca швед-инглиз вакциналари.
Қирғизистон Соғлиқни сақлаш вазирлигининг маълумотларига кўра, 23 июль ҳолатига мамлакатда 300 мингдан зиёд одам вакцинанинг биринчи дозасини олган, 100 мингдан ортиқ одам иккинчи дозаси билан эмланган.
Мамлакатда пандемия даврида 155 005 кишида коронавирус қайд этилган. Бу вақт ичида COVID-19 билан касалланган 2227 бемор вафот этган.
Апрель ойи бошида Қозоғистон президенти Қосим-Жўмарт Тўқаев коронавирусга қарши Қарағанда фармацевтика заводида ишлаб чиқарилган «Спутник V» вакцинаси билан эмланганди. 25 июнь куни Қозоғистон биринчи президенти Нурсултон Назарбоев ҳам худди шу турдаги вакцинанинг биринчи дозасини олди.
Шунингдек, Россия президенти Владимир Путин 23 март куни коронавирусга қарши вакцинанинг биринчи дозасини,14 апрель куни эса иккинчи дозасини қабул қилди. Путин Россиянинг «Спутник V» вакцинаси билан эмланган.
Изоҳ (0)