Австралиянинг Battle Approved Motors компанияси краудфандинг орқали пул йиғилаётган ўзининг R101 электройўлтанламасининг илк суратлари билан бўлишди. Келажак машинаси икки ўриндиқли квадротцикл кўринишида бўлиб, унда ҳайдовчи ва йўловчи ёнма-ён ўтиради. Ferrari ва Tesla ўртасида модель бўлиши кутилаётган электрокарни яратиш ишлари ҳозирда якунланиш арафасида, деб хабар беради Motor.
Ихтирочилар ўзининг транспорт воситасини параллель ўтириладиган квадротцикл деб таърифламоқда. Ушбу электромобилни яратиш билан Battle Approved Motors компаниясининг раҳбари Крис Жеймс ва собиқ BMX-пойгачи беш йилдан буён шуғулланиб келяпти. Икки ўриндиқли электрокар маҳаллий ҳудуд шароитидан келиб чиқиб автоматик равишда машина ости ва йўл юзаси орасидаги баландликни ўзгартиришга қодир инновацион «подвеска» билан жиҳозланади. Суратларга кўра, квадротцикл тўртта сенсорли дисплейга эга бўлади, улардан бири руль чамбарагига ўрнатилади. Марказий экран худди Tesla’даги каби вертикал жойлашади.
Электройўлтанламас ички хавфсизлик каркаси ва тўлиқ узатмали тизимга эга бўлади. Квадротциклнинг мотори ҳақида ҳозирча маълумот йўқ, бироқ муҳандисларнинг сўзларига кўра, унга бензинли муқобилидан кучлироқ агрегат ўрнатилади.
Машина ихтирочилари мазкур транспорт воситасини ёмон йўлларда ҳам ҳаракатланишга қодир Ferrari ва Tesla оралиғидаги машина сифатида таърифламоқда.
Компания ҳозирда янги йўлтанламасни яратиш учун краудфандинг платформаси орқали маблағ тўплашда давом этмоқда. Айни вақтда мутахассислар 830 минг долларга яқин пул тўплаган. Муҳандислар илк электрокарларини 2022 йилда бозорга чиқаришни режалаштирмоқда.
Изоҳ (0)