Тошкентда 16 июль куни бўлиб ўтаётган халқаро конференция доирасида Шавкат Мирзиёев Ҳиндистон ташқи ишлар вазири Субраманям Жайшанкарни қабул қилди, деб хабар бермоқда Президент матбуот хизмати.
Қайд этилишича, давлат раҳбари Ўзбекистон—Ҳиндистон стратегик шериклик ва кўп қиррали ҳамкорлик муносабатлари олий даражадаги мунтазам мулоқотлар давомида эришилган келишувларга мувофиқ изчил ривожланиб бораётганини мамнуният билан қайд этди.
Вазир Жайшанкар Ўзбекистон етакчисига Ҳиндистон бош вазири Нарендра Модининг саломи ва самимий тилакларини етказди.
Ўзбекистоннинг Марказий ва Жанубий Осиё ўртасидаги боғлиқликни, шунингдек, Афғонистонда тинчликка эришиш ва ушбу мамлакат иқтисодиётини тиклашга қаратилган минтақавий лойиҳаларни илгари суриш борасидаги саъй-ҳаракатлари юксак баҳоланди.
Икки мамлакат ҳудудларини фаол жалб қилган ҳолда инвестициялар, инновациялар, савдо, бизнес, логистика, ахборот технологиялари, соғлиқни сақлаш ва бошқа устувор йўналишларда қўшма лойиҳаларни амалга ошириш муҳим эканлиги таъкидланди.
Мамлакатлар «Ҳиндистон—Марказий Осиё» форматидаги самарали мулоқотни давом эттиришдан манфаатдор эканини қайд этди.
Бундан аввал Шавкат Мирзиёев Тошкентда бўлиб ўтаётган халқаро конференция доирасида Хитой ташқи ишлар вазири Ван I ни, Россия ташқи ишлар вазири Сергей Лавровни қабул қилгани ҳақида хабар берилган эди.
Давлат раҳбари, шунингдек, Афғонистон ҳамда Покистон президенти билан, Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел билан учрашди.
Изоҳ (0)