Ford Mustang Mach-E электрокроссовери бир киловатт/соат энергия сарфлаб узоқ масофа босиб ўтиш борасида Гиннеснинг рекордлар китобидан жой олди. Шотландия шимолидаги Жон O’Гроутс қишлоғидан тўлиқ қувватланган ҳолда йўлга чиққан машина 1352 километр йўл босиб, Буюк Британиянинг энг ғарбий нуқтаси — Лендс-Энд бурнига қадар борган. Уч кишидан иборат жамоат таркибида BBC мухбири Пол Клифтон ҳам бор, деб ёзади Motor. Машина бир киловатт/соат электр энергияси ёрдамида 10,5 километр юрган.
Сафардан мақсад электрокарлар узоқ йўл боса олишини исботлаш орқали Гиннесга кириш эмас, балки улар ёнилғили двигателларга рақобат қила олишини кўрсатиб бериш бўлган. «Ушбу рекорд эндиликда электромобиллар барчага мос келишини намойиш этади. Нафақат шаҳар ёки ишга боришдаги қисқа ҳаракатлар, балки бутун мамлакат бўйлаб узоқ сафарлар учун ҳам», — дейди мухбир. Машинани бу каби рекордлардан бир нечтасини ўрнатган Фергал Макграт ва Кевин Букер бошқарган.
Рекордни 294 от кучини тақдим этишга қодир электромотор ва 88 киловатт/соатли батарея билан жиҳозланган Mustang Mach-E Extended Range RWD ўрнатган. Ушбу кроссовернинг паспортида бир марта тўлиқ қувватланиш орқали 610 километр йўл босиши кўрсатилган, аммо синовлар ушбу кўрсаткич 800 дан ошиши мумкинлигини исботлади. 1352 километр узунликдаги маршрут давомида машина аккумулятори икки марта қувватлантирилган бўлиб, бунга 45 дақиқа сарфланган. Ford маълумотларига кўра, 150 киловаттли терминалдаги 10 дақиқа Mustang’нинг қўшимча 117 километр йўл босишига ёрдам беради.
Рақамлар, албатта, ҳайратланарли. Аммо Буюк Британияда ўрнатилган яна бир «рекорд»ни ҳам эслаб ўтиш ўринли. Жоэ Ачиллес исмли блогер дизелда ҳаракатланувчи BMW 730 Ld (265 от кучи; 620 Нм)нинг ёнилғи бакини бир марта тўлдириб, 1450 километр йўл босган. Ҳаракатнинг ўртача тезлиги соатига 100,9 километрни ташкил этган, ёнилғи сарфи — 4,5 литр, паспорти бўйича эса седан 5,3—5,8 литр сарфлайди.
Изоҳ (0)