Ўзбекистон товар-хом ашё биржасидаги 21—27 июнь кунларги савдоларда шакар ва бензин нархи кўтарилди, цемент нархи эса тушди. Бу ҳақда биржа матбуот хизмати хабар қилди.
Ўтган ҳафта давомида, яъни 21—27 июнь кунлари Ўзбекистон товар-хом ашё биржасининг барча савдо платформаларида 1 триллион 847 миллиард 500 миллион сўмлик товарлар сотилган бўлиб, бу аввалги ҳафтага нисбатан 3,4 фоизга ортиқдир. Бунда сотувларнинг 87,9 фоизи — биржа савдолари; 1,3 фоизи — кўргазма-ярмарка савдолари; 10,4 фоизи — электрон давлат харидлари ва 0,4 фоизи авторақамларнинг онлайн-аукционига тўғри келди.
Кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 670,8 миллиард сўмни ташкил қилди. Давлат харидлари тизимларида ўтказилган электрон савдолар натижасида бюджет ва корпоратив буюртмачиларнинг қарийб 34,2 миллиард сўмлик маблағлари тежалди.
Кўриб чиқилаётган давр мобайнида онлайн аукцион орқали 3770 та авторақам сотилди, сотилган давлат рақам белгиларининг умумий суммаси 8,3 миллиард сўмни ташкил қилди. Рақобатли савдолар натижасида битимларнинг 10,5 фоизи биринчи тоифадаги авторақамларга; 14,6 фоизи иккинчи; 9,0 фоизи учинчи; 12,7 фоизи тўртинчи; 16,9 фоизи бешинчи ва 36,3 фоизи олтинчи тоифа авторақамларга тегишлидир.
Биржа савдолари
Кўриб чиқилаётган даврда очиқ биржа савдолари орқали жами 1 триллион 623,9 миллиард сўмлик товар ресурслари сотилди. Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйди, шу жумладан:
Шакар
Биржанинг шакар бозорида нархлар бир оз ўсди. Ҳафта давомида биржа савдоларига 12 790,0 тонна шакар қўйилди ва улардан барча ҳажми, яъни 100 фоизи сотилди. Ўртача харидорлар сони 149 кишини ташкил қилди.
Кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 7650,4 минг сўмдан 7704,0 минг сўмгача, яъни 1 фоизга ўсган.
Ўтказилган биржа савдолари натижасида маҳаллий шакарнинг 3-категорияси бўйича шаклланган ўртача ҳафталик нархи маҳсулотнинг бир тоннаси учун 7716,6 минг сўмни ташкил этди.
Цемент
Биржанинг цемент бозорида ички талабнинг ўсишига қарамасдан нархлар пасайишда давом этмоқда. Ўтган ҳафта мобайнида биржа савдоларига 303 029,0 тонна цемент қўйилди ва улардан 183 639,0 тоннаси, яъни 60,6 фоизи сотилди. Ўртача кунлик сотув ҳажмлари 36,7 минг тоннани ташкил қилди.
Кўриб чиқилаётган даврда цементнинг барча маркалари бўйича шаклланган кунлик ўртача нархлар маҳсулотнинг бир тоннаси учун 533,6 минг сўмдан 521,0 минг сўмгача, яъни 2,4 фоизга пасайди.
Бензин
Ўтган ҳафтада биржада автомобиль бензинининг нархи бир оз кўтарилди. Нархларнинг ошишига сотувчи-корхоналар томонидан бошланғич нархларнинг кўтарилиши сабаб бўлди.
Хусусан, кўриб чиқилаётган даврда сотувчи-корхоналар Аи-80 маркали автомобиль бензинининг бошланғич нархларини маҳсулотнинг бир тоннаси учун ўртача 6863,3 минг сўмдан 6970,8 минг сўмгача кўтарди.
Шу муносабат билан, Аи-80 маркали автомобиль бензинининг ўртача кунлик нархи ҳам мос тарзда 6958,6 минг сўмдан 7047,1 минг сўмгача кўтарилди.
Кўриб чиқилаётган даврда Аи-80 маркали автомобиль бензинининг ўртача ҳафталик котировкаси 7010,6 минг сўмни, Аи-91 маркали бензин эса 8158,6 минг сўмни ташкил этди.
Эслатиб ўтамиз, Ўзбекистон Президентининг 2020 йил 4 апрелдаги ПҚ-4664-сонли қарорига мувофиқ «Ўзбекнефтгаз» АЖ тасарруфидаги Бухоро нефтни қайта ишлаш заводи томонидан биржа савдоларига қўйиладиган автомобиль бензинининг бошланғич нархлари жаҳон биржаларидаги Brent нефтининг котировкаларидан келиб чиқиб шаклланади.
Турли манбаларда келтирилишича, автомобиль бензинининг бир тоннаси ўртача 1293—1370 литрни ташкил қилади.
Изоҳ (0)