Тошкент вилояти Қибрай туманида барпо этилаётган «Янги Ўзбекистон» боғи ва «Истиқлол» мажмуаси қурилишининг пудратчиси, давлат харидлари портали маълумотларига кўра, Mimar Group ҳисобланади. Бу ҳақда «Gazeta.uz» хабар берди.
Нашр Тошкент ҳокимлиги ҳузуридаги «Ягона буюртмачи хизмати» инжиниринг компаниясининг Қурилиш соҳасида назорат ҳудудий инспекцияси билан шартнома тузиш ҳақидаги иккита лотни (1, 2) жойлаштирганига эътибор қаратган. Шартнома қурилиш-монтаж ишларининг сифати ва тўлиқлигини назорат қилиш бўйича хизматларни тақдим этишни назарда тутади.
Ҳар икки лотда Mimar пудратчи ташкилот сифатида кўрсатилган. Биринчи лотда қурилиш-монтаж ишларининг қиймати 146,5 миллиард сўмга баҳоланиб, қурилиш ишларини бошлаш тўғрисидаги хабарнома 17 июнда топширилган. Иккинчи лот эса 47,8 миллиард сўмга баҳоланган ва хабарнома 19 июнда топширилган.
Ҳужжатларда лойиҳалаш ишларини параллел равишда олиб бориш учун Ўзбекистон Вазирлар Маҳкамасининг 2021 йил 8 майдаги қарори асос бўлиб хизмат қилиши кўрсатилган.
Mimar Group сайтидаги маълумотларга кўра, мазкур хусусий қурилиш компанияси 2020 йилда ташкил этилган бўлиб, йирик шаҳарсозлик лойиҳаларини — турар жойлар қурилишидан тортиб, саноат ва ижтимоий объектлар қурилишига қадар — амалга оширишга ихтисослашган.
Корхоналар ва ташкилотларнинг ягона давлат регистри (КТЯДР) маълумотларига кўра, асосий фаолият тури — турар жой биноларини қуриш. Таъсисчилари сифатида Алишер Ғаниев Абдубоситович (56,75 фоиз) ва Козимбек Яминов Ўткирович (43,25 фоиз) кўрсатилган, раҳбари — Ферузбек Давронов.
Компания 71 гектар майдонда Tashkent INDEX қурилиш савдо-ишлаб чиқариш мажмуаси лойиҳасини амалга оширмоқда, шунингдек, пойтахтдаги «Шаҳидлар хотираси» ёдгорлик мажмуаси реконструкциясига жалб қилинган.
Ўз навбатида, «Reyting.mc.uz» қурилиш-пудратчи ташкилотлар рейтингига кўра, Mimar Group ва Ijod-Ijod рейтинг баҳоси ССС (1-қониқарли даража, ишончлилик даражаси 30 фоиздан 35 фоизгача) бўлган қурувчилар гуруҳига мансуб.
Тошкент ҳокимлиги ва Қурилиш вазирлиги матбуот хизматлари мазкур ҳолатга изоҳ бермаган. Компания Mimar Group «Янги Ўзбекистон» боғи ва «Истиқлол» мажмуаси қурилиши лойиҳасини амалга ошираётганини тасдиқлаган.
Эслатиб ўтамиз, 1 май куни Ўзбекистон Президенти Шавкат Мирзиёев Тошкент вилоятининг Қибрай туманида янги боғ барпо этилаётган ҳудудга ташриф буюриб, илк дарахтларни ўтқазишда иштирок этганди. Президент янги боғда дарахтларни улкан дарахтнинг бешта новдаси шаклида экишни таклиф қилган, бу Ўзбекистонни ривожлантириш бўйича Ҳаракатлар стратегиясининг бешта устувор йўналишини рамзий маънода англатади.
Давлат раҳбари янги боғ ҳудуди, парламент тасдиқласа, Тошкент таркибига ўтказилишини маълум қилган. Худди шу ерда мамлакат мустақиллигининг 30 йиллигига бағишланган «Истиқлол» мажмуаси ҳам бунёд этилади. Қурилиш вазирлигининг аниқлик киритишича, гап Тошкент марказидаги Мовий гумбазлар хиёбонида жойлаштирилиши режалаштирилган мажмуа ҳақида кетмоқда.
Изоҳ (0)