АҚШнинг Сент-Луис шаҳрида жойлашган ҳайвонот боғи ташриф буюрувчилари пингвинлардан бири оёқ кийимда юрганига эътибор қаратди. Улар бундан ҳайратга тушиб, қушнинг суратини ижтимоий тармоқларга жойлаган. Пост тезда вирус каби тарқалгани сабаб ҳайвонот боғи ходимлари нима учун Энрике лақабли пингвинга оёқ кийим кийгизилганига изоҳ беришга қарор қилган, деб ёзади Glamour.
Маълум бўлишича, Энрике камида 30 ёшга тўлган. Пингвинлар ёввойи табиатда ўртача ўн йил умр кўради. Энрике артритдан азият чекади (бўғимлар яллиғланиши), шу сабаб унинг панжаларида шишлар пайдо бўлган. Бу каби ҳолатда крем ёрдам бермагани учун ҳайвонот боғи ходимлари унга сув ўтказмайдиган махсус оёқ кийим тикишга қарор қилган.
Шундай қилиб, Энрикенинг қизил чизиқли қора оёқ кийими пайдо бўлган. Ҳайвонот боғи ходимларининг сўзларига кўра, бу каби ранг бошқа қушларни чалғитмаслик учун танланган. Энрикега пойабзаллар ҳар куни тонгда кийдирилади ва уйқуга кетишидан олдин ечиб қўйилади.
«Энрике — анча ювош пингвин. Оёқ кийим кийгизиб, нима бўлишини кўриш мақсадида уни ерга қўйдик. Аввалига у бир нечта катта қадамларни ташлади, кейин эса бемалол юришни бошлади. Ўйлайманки, у бунга қарши эмас», — дейди ҳайвонот боғи ветеринари Жимми Жонсон. Унинг таъкидлашича, Энрике эндиликда оғриқ сезмасдан бемалол сузиши мумкин.
Аввалроқ Антарктидада пингвин оч косаткалардан қочиб, ичида туристлар бўлган қайиқ ичига сакрагани тўғрисида хабар берилганди.
Изоҳ (0)