Хитой ҳукумати май ойида бўлиб ўтган марафонда 21 нафар югурувчининг ўлимига сабабчи бўлган 27 нафар ҳукумат даражасидаги амалдорларга жавобгарлик чораларини кўрди, дея хабар берган BBC News.
Пойгалар ўтказилган Сзинтай ҳудуди раҳбари ўз лавозимидан озод қилинди. Маҳаллий шаҳар мери ва Байин шаҳрининг коммунистик партияси раҳбарига нисбатан ҳам интизомий жазо чоралари кўрилган. Бошқа амалдорларга огоҳлантиришлар ва хизматга беҳурматлик бўйича баҳолаш хулосалари берилган. Марафонни ташкиллаштирган компания эгаси Чжан Сяоян қамоққа олинган ва унга нисбатан жиноий айблов эълон қилинган.
11 июндан бошлаб Хитойда тўлиқ назоратга эга бўлмаган, қоидалар ва хавфсизлик стандартларига жавоб бермайдиган ҳар қандай спорт тадбирлари бекор қилинган.
Гансу провинциясидаги ултрамарафонда иштирок этган спортчиларга кучли довул, музли ёмғир ва ҳароратнинг кескин пасайиб кетиши оқибатида талафот етган. Давлат ОАВларнинг хабар қилишича, бир нечта спортчи қаттиқ совуқда қолиб кетиш оқибатида вафот этган. Марафон муддатидан илгари тўхтатилган. Ҳукумат махсус қутқарув операциясини амалга оширган. Пойгада жами 172 нафар одам иштирок этган.
Воқеалардан кейин ҳалок бўлганларнинг қариндошлари маҳаллий ҳукуматлардаги амалдор томонидан босимга учрагани, уларга фожиавий ҳолатлар ҳақида гапирмаслик айтилганини маълум қилган.
Эслатиб ўтамиз, май ойида Хитойнинг Юньнань провинциясида 5,6 баллдан 6,4 баллгача бўлган ер силкинишлари содир бўлган, шунингдек 1 июнда Хейлунсзян провинциясининг Шанчжи шаҳрига торнадо ёпирилиб, 150 га яқин уйга зарар етказган.
Изоҳ (0)