Lego компанияси 400 мингта конструктор деталларидан таркиб топган тўлиқ ўлчамли Lamborghini Sian гиперкарини тақдим этди, деб хабар беради Motor. Уни яратиш устида 15 нафар мутахассис 8660 соат иш олиб борган. 1:1 масштабдаги ўйинчоқ гиперкар Lamborghini Sian FKP 37 модели дизайнини такрорлайди. Бундан ташқари, ўйинчоқ машина ранги Lamborghini лак-бўёқ цехида тайёрланган.
Lego айрим рақамлар билан бўлишди. Масалан, ўйинчоқ гиперкарнинг йигирмата элементи нолдан бошлаб лойиҳалаштирилган ва фақат ушбу модель учун мос келади. Lego’дан йиғилган Sian’нинг оғирлиги 2,2 тоннани ташкил этади (ҳақиқий автомобиль оғирлиги — 1622 килограмм). Конструктордан йиғилган модель узунлиги 4,98 метрга, эни — 2,1 метрга, баландлиги — 1,13 метрга етади.
Маълум қилинишича, бу Lego’дан йиғилган биринчи Sian эмас. Ўтган йили Дания корпорацияси 1:8 масштабда гиперкарнинг Technic серияси жамланмасини тақдим этган. Lego Technic’нинг бундан олдинги жамланмалари Porsche 911 GT3 RS ва Bugatti Chiron’га бағишланган (мос равишда 2704 ва 3599 деталдан иборат).
Аввалроқ ветнамлик блогер ўғли учун ёғочдан ҳаракатланадиган Lamborghini Sian ясагани тўғрисида хабар берилганди.
Изоҳ (0)