Sony компанияси 24 соат автономликка эга симсиз наушнигини намойиш этди (видео)

Sony компанияси янги симсиз вакуум наушниклари — WF-1000XM4 моделини тақдим этди, деб хабар беради GSMarena.

Наушниклар V1 процессори базасидаги яхшиланган рақамли шовқин сўндириш тизимига, LDАC шарофати билан High-Resolution audio Wireless форматида мусиқа тинглаш имконияти ва Speak to-Chat типидаги «ақлли» функцияларга эга бўлган.

Янги гаджет шовқинни ўлчашга қодир иккиталик юқори сезгир микрофонлар билан жиҳозланган. Ҳар бир наушникда иккитадан микрофон турли томонга йўналган бўлиб, унинг ёрдамида тизим атрофдаги овозларни яхшироқ танийди ва таҳлил қилади, шу сабабли шовқинни юқори сифатда сўндириш тизимининг ишини таъминлайди. Шунингдек, Automatic Wind Noise Reduction режими наушникларга шамолнинг пайдо бўлишини аниқлашга ва юзага келадиган шовқинни автоматик сўндиришга ёрдам беради.

Бундан ташқари, наушниклар реал вақт режимида сифатли рақамли ёзувларни амалга ошириш имконини берадиган Edge-Аl алгоритмлари ва DSEE Extreme технологияларини қўллаб-қувватлайди. Гаджетдаги Adaptive Sound Control функцияси фойдаланувчининг қаерда эканлиги ва шуғулланаётган фаолиятига қараб наушникни созлайди.

WF-1000ХМ4 наушниги IPX4 стандарти билан ҳимояланган, яъни улар чанг ва намликдан қўрқмайди. Узлуксиз мусиқа тинглаш орқали наушник саккиз соат ишлай олади. Кейсдан қувватланиш орқали кўрсаткич яна 16 соатга оширилади.

Оқ ва қора рангларда сотувга чиқадиган Sony WF-1000ХМ4 наушнигининг расмий нархи 320 долларни ташкил этади.

Аввалроқ 10 дақиқа қувватланиш орқали 8 соат мусиқа тинглаш мумкин бўлган Oppo Enco Air наушникларини намойиш этилганди.