Ҳукуматнинг 3 июндаги қарори билан Республика Маънавият ва маърифат маркази ҳузурида Ижтимоий-маънавий тадқиқотлар институти ташкил этилди, деб хабар бермоқда Norma.
Ҳужжат Президентнинг 26 мартдаги «Маънавий-маърифий ишлар тизимини тубдан такомиллаштириш чора-тадбирлари тўғрисида»ги фармонини амалга ошириш мақсадида қабул қилинган.
Институт вазифалари қуйидагилардан иборат:
- маънавий-маърифий ишлар ҳолати, миллий ғоянинг мамлакат тараққиётидаги ўрни, жамият барқарорлигига салбий таъсир кўрсатадиган таҳдидлар тўғрисида илмий-амалий изланишлар олиб бориш;
- мамлакатдаги ижтимоий ва маънавий муҳит ҳолатини ўрганиш, баҳолаш ва яхшилаш бўйича илмий ва амалий таклифларни тайёрлаш;
- маънавий-маърифий тарғибот ишларини амалга оширишнинг самарали ва таъсирчан замонавий тарғибот технологиялари ҳамда усулларини ишлаб чиқиш;
- бузғунчи ғоялар ва ахборот таҳдидларига қарши мафкуравий иммунитетни мустаҳкамлаш бўйича тадқиқотлар ўтказиш, аҳоли ўртасида интернетдан фойдаланиш маданиятини ошириш;
- одамлар тақдирига бефарқлик, маҳаллийчилик, қариндошлик, коррупция, оилавий қадриятларга бепарволик, ёшлар тарбиясидаги масъулиятсизликни йўқ қилишга қаратилган комплекс чора-тадбирларни ишлаб чиқиш.
Муассаса давлат бюджети, хайрия маблағлари ва халқаро грантлар ва қонунчиликда тақиқланмаган бошқа манбалар ҳисобидан молиялаштирилади.
Эслатиб ўтамиз, Шавкат Мирзиёев 19 январь куни маънавият масалаларига бағишлаб ўтказилган йиғилишда «Манавият тарғиботчиси» таълим муассасаси негизида Ижтимоий ва маънавий тадқиқотлар институтини ташкил этишни таклиф қилганди.
Изоҳ (0)