Қўқон шаҳридаги 64-ихтисослаштирилган мактабгача таълим ташкилотининг туғруқ таътилига чиққан ходими ишга қайтиши учун ундан пул сўраган боғча раҳбари вазифасида ишлаган Р.И. ва муассаса ошпази Р.П. исмли аёллар пора билан қўлга тушди, дея хабар бермоқда ЎзА.
Қайд этилишича, уч йилдан буён мазкур муассасани бошқариб келаётган Р.И. муассаса ошпази билан тил бириктириб, илгари бу ерда ишлаб, туғруқ таътилида бўлган Н.М.нинг ишга қайтиш бўйича мурожаатини қайтарган ва ходимни ишга қайта тиклаш учун 200 АҚШ доллари сўраган.
Ҳуқуқни муҳофаза қилувчи органлар томонидан ўтказилган тезкор тадбир давомида ошпаз Р.П. ўзининг яшаш хонадони Ўзбекистон тумани «Навбаҳор» маҳалла фуқаролар йиғинида Н.А.дан 200 АҚШ долларини Р.И.га бериш учун олган вақтда ушланган. Тезкор тадбир давом эттирилиб, боғча мудираси ошпазидан Н.М.ни туғруқ таътилидан қайта ишга олиш эвазига 200 АҚШ долларини олган вақтда далилий ашё билан қўлга тушган.
Жиноят ишлари бўйича Қўқон шаҳар суди томонидан мазкур иш кўриб чиқилди. Судланувчи аёллар суд жараёнида ўз айбига иқрорлигини билдирди. Ҳолат юзасидан Р.И.га Жиноят кодексининг 210-моддаси 1-қисми билан (пора олиш) 2 йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилган ҳолда 3 йил озодликдан чеклаш жазоси тайинланди. Хабарда муассаса ошпази Р.П.га қандай жазо тайинлангани очиқланмаган.
Бундан аввал Андижонда жиянига чиқарилган суд ҳукмини ёпиб юбориш эвазига ИИБ ходимига 500 доллар бермоқчи бўлган шахс ушлангани, Тошкентда ер олиб беришни ваъда қилиб, фуқародан 52 800 доллар олган шахс қўлга олингани ҳамда Самарқандда фуқарони алдаб, унинг 50 минг доллар пулини ўзлаштирган адвокат 7 йилга озодликдан маҳрум қилингани ҳақида хабар берилганди.
Изоҳ (0)