Ўзбекистонда «фудтрак»лар орқали савдо қилишнинг янги тартиби тасдиқланди. У декабрь ойидан кучга киради

Президент Шавкат Мирзиёев «Кўчма савдо фаолиятига ахборот технологияларини жорий этиш ва савдо автомати орқали чакана савдо фаолияти билан шуғулланувчи тадбиркорлик субъектларини қўллаб-қувватлаш чора-тадбирлари тўғрисида»ги қарорни имзолади, деб хабар беради ЎзА. Унга кўра, 1 декабрдан бошлаб барча жараёнлар онлайн, махсус «К-Савдо» платформасида амалга оширилади.

Қарорга мувофиқ:

• кўчма савдо фаолияти тадбиркорлик субъектлари томонидан кўчма савдо объектларини электрон тарзда «К-Савдо» автоматлаштирилган ахборот тизимида рўйхатдан ўтказиш йўли билан амалга оширилади. Бунда тадбиркорлик субъектларидан рўйхатдан ўтказиш учун йиғим ундирилмайди;
• кўчма савдо жойи (хусусий мулкдорларга тегишли жойлардан ташқари) кўчма савдо объектларининг жойлашиш схемалари бўйича «К-Савдо» орқали электрон аукционда сотилади.

Аукционнинг бошланғич нархи тегишли туман (шаҳар)даги ер участкасининг ер солиғи миқдорида белгиланади. Бунда аукцион орқали сотишдан келиб тушган пул маблағларининг 80 фоизи тегишли туман (шаҳар) маҳаллий бюджетларига, 20 фоизи Давлат солиқ қўмитасининг махсус ҳисоб рақамига йўналтирилади.

Аукцион ғолиби томонидан кўчма савдо жойининг қиймати тўлиқ тўланганидан сўнг унга «К-Савдо» орқали автоматик равишда QR-код қўйилган гувоҳнома берилади ҳамда у мазкур жойдан 36 ой муддатга фойдаланиш ҳуқуқига эга бўлади. Бунда кўчма савдо жойидан фойдаланиш бўйича шартнома тузиш талаб этилмайди.

Шунингдек, тадбиркорлик субъектлари ёки фуқароларнинг «К-савдо»да рўйхатдан ўтмасдан кўчма савдо фаолияти билан шуғулланаётганлиги биринчи марта аниқланган тақдирда, давлат солиқ хизмати органлари ходимлари уларга чакана савдо фаолиятини «К-Савдо» рўйхатдан ўтган ҳолда амалга ошириш бўйича зарур тушунтириш ишларини олиб бориши ҳамда рўйхатдан ўтказиш бўйича амалий ёрдам кўрсатиши лозим.

Савдо автоматлари орқали товарларни сотиш ва (ёки) хизматларни кўрсатиш фаолияти билан шуғулланувчи тадбиркорлик субъектларини янада қўллаб-қувватлаш мақсадида:

• савдо автоматларига нисбатан назорат-касса техникаларидан мажбурий фойдаланиш талаби татбиқ этилмайди;
• сотадиган товарлари ва (ёки) кўрсатадиган хизматлари туридан қатъий назар бундай фаолият билан шуғулланувчи юридик шахслар чакана савдо соҳасидаги солиқ тўловчи деб эътироф этилади.

Эслатиб ўтамиз, 2020 йилда Ўзбекистонда тадбиркорларнинг рухсат олишда шаффоф механизмнинг йўқлиги сабаб ёзги террасалар ноқонуний деб топилаётгани тўғрисида хабар берилганди. Масалан, «қоғозда» муниципал ҳудудга фудтрак (кафе-фургон) жойлаштириш учун ҳудудга жавобгар ҳокимлик билан шартнома имзолаш кифоя, бироқ регламент йўқлиги сабаб буни амалиётда қўллаш имконсиз эди.