Сирдарё вилоятининг Оқолтин туманида Lacetti’нинг газ баллони портлаши оқибатида икки киши ҳалок бўлди. Бу ҳақда ФВВ матбуот хизмати хабар берди.
Воқеа 1 июнь соат 03:40 да юз берган. Қашқадарё вилояти Миришкор туманида яшовчи фуқаро Lacetti’да Сирдарё вилояти Оқолтин тумани «Янги Давр» МФЙ ҳудудидан ўтувчи Термиз—Тошкент йўлида ҳаракатланиб кетаётганида автомашинанинг газ баллонида ёрилиш содир бўлган.
Оқибатда автомашинадаги икки нафар йўловчи воқеа жойида вафот этган ҳамда ҳайдовчи ва бир нафар йўловчи турли даражада жароҳат олиб Оқолтин тумани тиббиёт бирлашмасига жойлаштирилган.
Қайд этилишича, айни вақтда вилоят ИИБ, ФВБ, ССБ ва Прокуратура ходимлари томонидан ҳолат юзасидан дастлабки терговолди суриштирув ишлари олиб борилмоқда.
Аввалроқ Қашқадарёда ҳаракатланаётган Nexia’нинг газ баллони портлаши оқибати икки киши ҳалок бўлгани, Фарғонадаги заправкада «Жигули»нинг газ баллони портлаши оқибатида машина ҳайдовчиси ва яна бир киши тан жароҳати олгани ҳақида хабар берилган эди.
Изоҳ (0)