Тошкентнинг Сергели ва Яккасарой туманларини бир-бирига боғлайдиган йўл лойиҳаси доирасида Кичик ҳалқа йўли устидан кўприк қурилаётгани сабабли йўл қатнов қисмининг ўлчамлари икки ойга ўзгартирилади. Бу ҳақда Тошкент шаҳар ҳокимлиги матбуот хизмати маълум қилди.
«Усмон Носир 2-тор кўчасининг Кичик ҳалқа йўли билан кесишган қисмида қатнов қисмининг умумий эни 10 метрни, баландлиги 4,5 метрни ташкил қилади. Транспорт қатнови икки томонлама бўлади. Ушбу йўл қисмидан ўтаётганда ноқулайликларнинг олдини олиш учун ҳайдовчилардан транспорт воситалари ва юкларнинг ўлчамларини инобатга олишларини сўраймиз», — дейилади ҳокимлик ахборотида.
Маълумот учун, Чўпонота кўчаси, Кичик ҳалқа йўли, Тошкент ҳалқа автомобиль йўли ва Сергелидаги Қипчоқ кўчасини бирлаштирувчи 5,6 километрлик йўл қурилиши (йўлда учта йўл ўтказгич бўлиши кўзда тутилган) 2020 йил август—сентябрида бошланган эди. Дастлаб лойиҳа қиймати 280 миллиард сўмга баҳоланган эди, бироқ, сўнгги маълумотларга кўра, лойиҳа баҳоси 518,3 миллиард сўмгача ошган.
Қайд этиш жоиз, қурилаётган бу йўл дастлабки режа бўйича 2021 йил май ойида фойдаланишга топширилиши керак эди.
Изоҳ (0)