Салваторе Гарау исмли италиялик ҳайкалтарош ўзининг «Мен мавжудман» номли кўринмас «ҳайкали»ни 15 минг еврога сотди, деб хабар беради «Korrespondent.net».
Таъкидланишича, ушбу ижод намунаси замонавий санъат билан шуғулланувчи Art-Rite кимошди уйи томонидан ташкиллаштирилган аукционда сотилган.
Харидор ростан ҳам ҳаво эмас, балки санъат намунасини харид қилганини тасдиқловчи махсус сертификат ҳам мавжуд.
Гараунинг ўзини сўзларига кўра, унинг «ҳайкали» фақат хусусий уйга сиғади. Уни «ўрнатиш» учун полда ўлчами 1,5х1,5 метр бўлган бўш жой керак. Ижодкорнинг ҳисоблашича, бўшлиқ — бу энергия билан тўлган макон.
«Бўшлиқ — энергияга тўла макон ва уни бўшатсак ҳам, ҳеч нарса қолмаган тақдирда ҳам, Гейзенбергнинг ноаниқлик принципига кўра, йўқ нарсанинг оғирлиги бор. Шундай экан унинг конденсацияланиб, зарраларга, қисқача айтганда, бизга айланувчи энергияси мавжуд», — дейди у.
Нашрнинг ёзишича, бу Гараунинг биринчи кўринмас «ҳайкали» эмас. 2020 йилнинг февралида у Миландаги майдонда «Мушоҳада қилаётган Будда» номли ишини «намойиш этганди».
Изоҳ (0)