Мадриднинг «Реал» клуби бош мураббийи Зинедин Зидан жамоани тарк этди. Бу ҳақда клуб матбуот хизмати хабар бермоқда.
Қайд этилишича, истеъфо ҳақидаги ташаббус франциялик мутахассиснинг ўзидан чиққан. Томонлар 2022 йилнинг ёзига қадар мўлжалланган шартнома бекор қилди.
Зидан «Реал»га иккинчи бор бош мураббий бўлганидан сўнг Испания чемпионати ва Испания Суперкубогида ғалаба қозонди. 2020/21 йилги мавсумда «Реал» Ла Лигада иккинчи ўринни эгаллаган бўлса, Чемпионлар Лигасида ярим финалгача етиб борди.
Зидан бунгача 2016—2018 йилларда ҳам Мадрид клубини бошқарган. Шу вақт ичида у Чемпионлар Лигасида кетма-кет уч марта зафар қучган. Шунингдек, «қироллик клуби» унинг қўл остида Испания чемпионати, мамлакат Суперкубоги ва икки мартадан УЕФА Суперкубоги ҳамда клублар ўртасидаги Жаҳон чемпионатида ғалаба қозонган.
Изоҳ (0)