БМТ метеорологлари: «Яқин беш йил ичида рекорд даражада илиқ йил кузатилади»

Яқин беш йил ичида 90 фоиз эҳтимол билан кузатувлар тарихидаги энг илиқ йил қайд этилиши кутилмоқда. Бу ҳақда БМТнинг ихтисослашган Жаҳон метеорология ташкилоти (ЖМТ) хабар берди.

«Яқин беш йилнинг энг камида бир йили шу пайтгача энг иссиқ ҳисобланган 2016 йил кўрсаткичларидан ошиб кетиш эҳтимоли 90 фоизни ташкил қилади», — дейилади хабарда.

ЖМТ прогнозларига кўра, ушбу беш йилликнинг ҳар йилида қуруқлик ва денгиз сатҳидаги ўртача ҳарорат саноатгача бўлган даврнинг ҳарорат кўрсаткичларидан энг камида бир даражага юқори бўлади. Энг иссиқ йилда 40 фоиз эҳтимол билан, ҳарорат саноатгача бўлган даврга таққослаганда 1,5 даражага ошиб кетиши мумкин.

2020 йилда ўртача ҳарорат саноатгача бўлган даврнинг асосий кўрсаткичларидан 1,2 даражага ошди ва тарихда кузатилган учта энг иссиқ йилдан бири сифатида қайд этилди.

Аввалроқ «Росгидромет»нинг Воейков номидаги Бош геофизика обсерваторияси директори Владимир Кацов иқлим ўзгариши шароитида Россияда ҳароратнинг кўтарилиш даражаси дунёнинг ўртача даражасидан юқори эканини айтган эди. Шундай қилиб, Россияда сўнгги ўн йил ичида ҳароратнинг ўсиши 0,51 даражани, дунё бўйича эса 0,18 даражани ташкил этди.

Шунингдек, WWF Россия «Иқлим ва энергетика» дастури директори Алексей Кокорин ҳам дунё билан таққослаганда Россиядаги ҳароратнинг кўтарилиши ҳақида гапирди. Унинг сўзларига кўра, ҳозир глобал исиш ўн йил ичида 0,2 даражани ташкил қилмоқда, лекин Россияда бу ўзгариш икки баробар тезроқ содир бўлмоқда.

Аввалроқ Ернинг ҳарорати 2020 йилда сўнгги 3 миллион йил ичидаги рекорд даражага кўтарилгани ҳақида хабар берилганди.

Маълумот учун, Корнелл университети томонидан АҚШ Қишлоқ хўжалиги вазирлиги кўмагида олиб борилган тадқиқотга кўра, иқлим ўзгариши оқибатида қишлоқ хўжалигининг умумий миллий маҳсулдорлиги 1960 йиллардан буён 21 фоизга пасайган. Бундай пасайиш сўнгги етти йил ичидаги маҳсулдорликнинг ўсишини йўқотиш билан тенгдир, дея таъкидлайди олимлар.

Шунингдек, глобал исиш Ерни 35 миллион йил ортга қайтариши, 2100 йилга бориб ёз фасли ярим йил давом этиши ҳақида олимларнинг прогнозлари хабар қилинганди.