Британия мудофаа вазири Россияни «биринчи рақамли хавф» деб атади

Россия Буюк Британия учун «биринчи рақамли хавф» ҳисобланади, дея маълум қилди Британия мудофаа вазири Бен Уоллес The Telegraph нашрига берган интервьюсида. Унинг сўзларига кўра, Россия сувости кемалари Бирлашган қиролликнинг «бутун қирғоқлари бўйлаб айланиб юрибди».

«Биз деескалацияни амалга оширишга уриндик, турли усулларни қўллаб кўрдик, аммо ҳозирги вақтда Россия ўз хатти-ҳаракатларини ўзгартирмас экан, биз қаерга қараб бораётганимизни тушуниш жуда қийин», — деди Уоллес.

Вазирнинг фикрига кўра, Россия кемалари Британия чегаралари яқинида ортиқча фаолликни қайд этди. «Бизнинг мамлакатимизга ҳамма жойга бурнини суқувчи Россия кемалари мунтазам қадам ранжида қилиб туради, булар Россиянинг бир нечта ҳарбий кемаларидир», — дея таъкидлади у.

Уоллеснинг сўзларига кўра, Россия кемалари одатда Шимолий денгизга ёки Ла-Маншга киради. Аммо 2020 йил охирида Россия сувости кемаси Ирланд денгизида аниқланган бўлиб, бу «анчадан буён» биринчи марта кузатилган.

Буюк Британия ҳукумати март ойида мудофаа ва ташқи сиёсат бўйича янги стратегияни тақдим этган, унда Россия мамлакат хавфсизлиги учун энг жиддий таҳдид деб аталган эди. Лондон Trident баллистик ракеталари учун ядровий жанговар каллаклар сонини 180 дан 260 тагача ошириб, ядро салоҳиятини 40 фоизга кучайтиришга қарор қилди.

Уоллеснинг ўша пайтда аниқлик киритишича, Россиянинг ракетага қарши мудофаа соҳасига инвестициялари ўсаётган бир пайтда қироллик ўз ядро потенциалини мустаҳкамламоқда. Ўз ядро салоҳиятини кенгайтиришига қарамасдан, Буюк Британия жанговар каллаклари ядро давлатлари ўртасида энг ками бўлади, деди у.

Россия ташқи ишлар вазири ўринбосари Александр Грушко Британиянинг ядро салоҳиятини ошириш борасидаги режаларини Россия ва АҚШнинг СНВ-3 (Россия ва АҚШ ўртасидаги стратегик ҳужум қуролларини янада қисқартириш ва чеклаш бўйича чоралар тўғрисидаги битим) шартномасини узайтириш ҳақидаги келишувлари фонида «жуда ғалати» деб атади (кейинроқ шартнома яна беш йилга узайтирилди). Ташқи ишалр вазирлиги расмий вакили Мария Захарова Лондоннинг қарорини «империяга хос амбициялар» деб атади.